Pas dy ditë shtyrje, Ajas Sulejmeni ka dalë sot kokë ulur në gjykatë për t’u njohur me rivlerësimin e masës së sigurisë, pas aksidentit të rëndë të dielën në Rrugën e Kavajës, ku ai akuzohet se përplasi çiftin me fëmijën e tyre 3 muajsh dhe u largua nga vendi i ngjarjes. Gjykata e la në burg 39-vjeçarin.
Organi i akuzës kishte kërkuar “arrest me burg”. Ai është shfaqur kokëulur në sallë, në pritje të nisjes së seancës.
Ajas Sulejmani ka deklaruar se “nuk pata qëllim të ikja, kisha vajzën e mitur në makinë dhe shkuam në spital”.
Sulejmani ka deklaruar para hetuesve se “atë moment nuk më mbajtën, s’di çfarë ndodhi!
DËSHMIA E SULEJMANIT
Personi që shkaktoi aksidentin e frikshëm, teksa hyri me të kuqe dhe përplasi çiftin bashkë me foshnjën e tyre, u vu në pranga menjëherë pas aksidentit.
Ndër të tjera, Policia i ka vendosur një gjobë mbi 1 milion lekë të vjetër dhe i ka hequr patentën për 2 vjet.
Në gjobën e bërë publike nga Policia e Tiranës vërehet edhe nënshkrimi i shoferit, i cili shkruan në fletën e ndëshkimit: Nuk jam dakord!
Ai është marrë në pyetje nga ana e oficerit të Policisë Gjyqësore, ku ka mohuar se ka qenë nën efekte droge apo alkooli, por po nxitonte pasi kishte vajzën 5 vjeçe të sëmurë dhe donte ta çonte në spital.
Mësohet se ai i ka thënë Policisë se “ika të lija vajzën në spital dhe nuk u largova nga vendi i ngjarjes”.
Në fakt, Ajas Sulejmani u kap në një spital privat nga ana e Policisë, ku ai dëshmoi:
“Kalova në anën tjetër të rrugës së Kavajës, mora një njeriun tim me makinë që të më çonte me vajzën në spital”.
Në fakt ende nuk dihet se çfarë ka dëshmuar personi që ishte në mjet me Sulejmanin dhe po ashtu Policia nuk bën me dije nëse në momentin e arrestimit të tij në spitalin privat, ai e kishte të bijën me vete, siç edhe pretendon.
g.kosovari
