“I nxorrëm nga makina e shtypur duke përdorur dritat e celularëve. Njoftuam disa herë policinë dhe autoambulancën por ata erdhën pas 50 minutash”.
Kjo është dëshmia e Klajdi Ndreçkës, një ndër personat që ndërhynë të parët për të nxjerrë nga makina tre të rinjtë që u aksidentuan mbrëmë tek rrethrrotullimi i Kolonjës në aksin Fier-Lushnje.
Duke folur “Abc News”, ai thotë se kur i kanë nxjerrë tre djemtë e aksidentuar nga makina, vetëm njëri prej tyre mund të fliste, ndërsa dy të tjerët ishin të pavetëjdijshëm.
“Vetëm njëri nga ata fliste, ishte me veshje të kuqe, kurse dy të tjerët jo. I nxorrëm i lamë aty deri sa të vinte autoambulanca sepse nuk donim edhe t’i dëmtonim”, shprehet ai duke theksuar se edhe kur erdhi autoambulanca, në makinë ishin vetëm shoferi dhe një infermiere.
Tre të rinjtë Alteo Shabani 18 vjeç, Jorges Shaban 21 vjeç, dhe Alban Doksani 16 vjeç, po udhëtonin në aksin Fier-Lushnje gjatë mbrëmjes së djeshme me një mjet “Daimler Crysler”, teksa pësuan aksident tek rrethrrotullimi i Kolonjës.
Siç bën me dije policia, në aksident humbi jetën në vend Jorges Shabani, ndërsa gjatë mëngjësit të sotëm ka ndërruar jetë edhe Alteo Shabani.
Ndërkohë që shtetasi A.D, 16 vjeç, ndodhet në Spitalin e Traumës në Tiranë nën kujdesin e mjekëve.
