Edhe pse në një kronikë televizive Silva Negollari rrëfeu shumë pak përpara kamerave nga dhimbja e madhe që ndien për humbjen e dy fëmijëve, ajo ka ndarë disa kujtime të hidhura nga dita kur dhe u përshi në aksidentit që do ti ndryshonte jetën.
Ajo thotë se shkaktarja kryesore e aksidentit ishte ajo vetë, pasi kishte humbur kontrollin e mjetit teksa ktheu kokën për të parë fëmijët në sediljen e pasme, që në atë moment i kanë tërhequr vëmendjen.
Gjatë një prononcimi për gazetën Panorama, Silva Negollari shprehet se jeta e saj ka marrë fund që në momentin që ikën përgjithnjë dy fëmijët e saj 3 dhe 5-vjeçar. Asgjë s’mund ta ngushëllojë nënën 24-vjeçare, e cila mbeti e plagosur vetë nga ky aksident tragjik bashkë me fëmijën e saj 1- vjeçar.
Ajo qëndron në shoqërinë e nënës dhe vjehrrës në shtëpinë dykatëshe në plazhin e Durrësit. Dy gratë përpiqen t’i qëndrojnë afër nënës së re, e cila ende nuk e ka marrë veten nga tronditja psikologjike nga ngjarja e ndodhur. Sipas Silva Negollarit, ajo ka humbur përqendrimin dhe kontrollin e makinës, pasi fëmijët 3 dhe 5-vjeçar, po luanin në sediljen e pasme të automjetit, të cilën po e drejtonte vetë 24- vjeçarja.
“Isha duke udhëtuar drejt Rrogozhinës, pasi fëmijët kishin dy-tri ditë që donin të shkonin të shihnin të atin e tyre në burg, i kishte marr malli… U nisëm në drejtim të Kavajës. Djalin e vogël e kisha vendosur në sediljen e parë dhe e kisha siguruar mirë, ndërsa dy të tjerët, si gjithmonë, në sediljen e pasme, por të palidhur me rrip sigurimi. Sapo kaluam Golemin, fëmijët pas nisën të bënin zhurmë duke luajtur me njëri-tjetrin. Në një moment ktheva kokën pas për të parë se çfarë kërkonin fëmijët. Por përfundova drejtpërdrejt në barrierën anësore të rrugës, e cila u mori jetën djalit dhe vajzës 3- vjeçare. Pas përplasjes, dola menjëherë nga makina dhe mora djalin e vogël në krah, ndërkohë dy fëmijët e tjerë ishin masakruar nga llamarinat e trafikndarëses, që u futën brenda në makinë”, u shpreh Silva Negollari.
Ajo është mjaft e tronditur nga skena tragjike e fëmijëve të saj, të cilën mesa duket do ta ketë të vështirë ta fshijë ndonjëherë.
“Unë jam fajtore kryesore për aksidentin, pasi humba kontrollin. Për fajin tim, humbën jetën dy fëmijët. Nuk dua të di për kushtet e sigurisë në rrugë, sepse ato skandaloze janë gjithandej. Çdo gjë që mund të them nuk do të m’i kthente fëmijët. Jam në kushte shumë të vështira psikologjike, jam e dërrmuar. Jeta ime mori fund në atë aksident. Nuk di çfarë të them më shumë”, u shpreh mes lotëve Silva Negollari, e cila shton se nuk do ta kërkojë fajin tjetërkund për vdekjen e fëmijëve të saj.
“Nuk e di nëse do ishin gjallë fëmijët po të ishte infrastruktura rrugore në rregull, por di të them që faji kryesor i kësaj tragjedie është i imi”. Aksidenti tragjik ndodhi pasditen e së shtunës së 7 majit, në vendin e quajtur Qerret, në aksin rrugor Durrës- Kavajë, ku si pasojë e humbjes së kontrollit të drejtueses Silva Negollari humbën jetën dy fëmijët e saj dhe mbeti e plagosur vetë më djalin e vogël 1-vjeçar, i cili ndodhej në sediljen e parë.
Panorama/d.i.
