Ngjarja e rëndë që ndodhi pak mesantës së mbrëmshme në rrugën e Velipojës u ka marrë jetën 4 të rinjve, të cilët mendohet se janë mbytur pasi automjeti me të cilin udhëtonin doli nga rruga dhe përfundoi në kanalin me ujë, i njohur si kanali i Vilunit.
Tre prej viktimave janë identifikuar dhe ata janë: Giorgio Angelo, 25 vjeç, Besmir Kola, 29 vjeç dhe Artemisa Peraj, 24 vjeçe.
Sipas burimeve për Opinion.al, 29-vjeçari nga Lezha Besmir Kola, që ishte edhe drejtuesi i automjetit tip BMW, përgatitej për ceremoninë martesore pak ditë më pas, por aksidenti tragjik e ka ndalur këtu udhëtimin e tij.
Të dhënat e para flasin për një rrugë të pandriçuar dhe me probleme, që duket se ka qenë edhe shkaku kryesor i ngjarjes.
Sipas burimeve për Opinion.al, aksidenti ka ndodhur në fundin e një rruge të drejtë dhe të asfaltuar, që ndërpritej befasisht nga një kthesë pas të cilës niste një rrugë e parikonstruktuar. e mbuluar me zhavorr.
Mungesa e sinjalistikës dhe ndricimit kane bërë që mjeti të vazhdojë me të njëjtën shpejtësi dhe intensitet lëvizjeje, duke humbur kontrollin edhe për shkak të zhavorrit duke rënë në kanalin e Vilunit, që rezultoi fatal për katër të rinjtë.
