Disa qytetarë protestuan mëngjesin e kësaj të shtune në Kukës për shkak të mungesës së sigurisë rrugore dhe numrin e lartë të aksidenteve. Për disa minuta bllokuan rrugën hyrëse të qytetit.
Shkak për protestën u bë aksidenti i së premtes ku një 51-vjeçar humbi jetën pasi u godit nga një automjet në rrugën hyrëse të qytetit që lidh Kukësin me Rrugën e Kombit. Kjo është zonë me fluks të lartë të lëvizjes së automjeteve dhe në dy anët e saj ndodhen dhjetëra biznese.
“Të zbatohet rregullorja për shoferë dhe këmbësorët. Kjo është rrugë që ka shumë lëvizje. Të bëhet me çdo kusht sinjalistika e re. Të vendosen kufizuesit e shpejtësisë. Janë ndër masat që duhet patjetër për të lajmëruar drejtuesit e makinave që duhet të ulin shpejtësinë për të mbrojtur kalimtarët”, tha një protestues.
Ndërsa një tjetër shprehet se “kam frikë kur çoj fëmijët në shkollë sepse nuk ka trotuar. Fëmijët lëvizin në anë të rrugës, kur makinat ecin me shpejtësi. Rruga është e ngushtë, s’ka as ndriçim dhe as sinjalistikë”.
Protesta do të përshkallëzohet të shtunën e ardhshme nëse nuk merren masa për shmangien e aksidenteve fatale. Kërkesat adresohen për Policinë Rrugore, Bashkinë e Kukësit dhe Prefekturën.
“Unë kam 20 vjet që merrem me biznes, këtu s’ka trotuar, s’ka ndriçim. Janë investuar 1.5 milionë euro, rruga është lënë në mes. S’ka trotuar, ndriçim, asgjë s’ka! Kemi frikë për fëmijët tanë! Policia Rrugore nuk rri këtu, rri atje te Gryka e Vanave. Kush e ka nis rrugën me vlerë 1.5 milionë euro dhe nuk e ka përfunduar, duhet të ndiqet penalisht”, tha një protestues.
Të premten e 21 Marsit, 51-vjeçari Sadik Murati, teksa lëvizte me çiklomotor për të shkuar në punë, u përplas për vdekje nga një 20-vjeçar që drejtonte makinen me shpejtësi. I riu është vënë në pranga.
