Policia e Shkodrës ka arrestuar shoferen e mjtetit tip “Porsche” e cila humbi kontrollin e mjetit dhe u përfshi në një aksident ditën e shtunë 20 maj.
Si pasojë e aksidentit mbetën të plagosura dy mikeshat që udhëtonin me 20-vjeçaren e arrestuar, të cilat po marrin ndihmë të specializuar mjekësore në spitalin e Traumës.
20-vjeçarja u ndalua për shkelje të rregullave të qarkullimit rrugor, ndërkohë që materialet procedurale i kaluan Prokurorisë pranë Gjykatës së Parë të Juridiksionit të Përgjithshëm Shkodër, për veprime të mëtejshme.
NJOFTIMI I POLICISË
Në vijim të informacionit paraprak të dhënë më datë 20.05.2023, për një aksident në aksin rrugor “Shkodër – Lezhë”, në fshatin Melgushë, ju bëjmë me dije se specialistët për Trafikun Interurban dhe Urban të DVP Shkodër arrestuan shtetasen R. P., 20 vjeçe, banuese në fshatin Mali i Jushit, Vau i Dejës, pasi duke drejtuar automjetin tip “Porsche”, ka humbur kontrollin mbi drejtimin e tij dhe për pasojë automjeti ka dalë nga rruga. Nga ky aksident kanë mbetur të dëmtuara pasagjeret në këtë automjet, shtetasja D. N. dhe shtetasja ukrainase I. K., të cilat marrin asistencë më të specializuar mjekësore, në Spitalin e Traumës, Tiranë.
/s.f
