Përdorimi në rritje i motorëve, biçikletave dhe mjeteve të tjera me dy rrota është shoqëruar edhe me një numër më të lartë aksidentesh. Dëmtimet në kokë dhe shtyllën kurrizore mbeten ndër pasojat më serioze.
“Të gjitha mjetet me dy rrota, apo zakonisht monopatinat, na kanë treguar që dëmtimet janë goxha të mëdha sepse përplasjet zakonisht janë në kokë dhe në pjesët e gjymtyrëve, duke dhënë hemorragji cerebrale apo edhe fraktura,” tha Jurgen Kinka, mjek neurokirurg.
Pajisjet mbrojtëse mund të reduktojnë ndjeshëm rrezikun e dëmtimeve të rënda.
“Një kokore, nëse nuk është e duhura ose nuk vendoset siç duhet, është e barabartë prapë me pasoja të tjera, sepse qëllimi i saj është për të zbutur goditjen. Duhet fiksuar mirë dhe duhet marrë me përmasat e kokës. Natyrisht duhen masa mbrojtëse edhe për pjesën e artikulacioneve, të cilat janë shumë lehtësisht të dëmtueshme”, tha ai.
Edhe një rrëzim që mund të duket i lehtë, në disa raste mund të ketë pasoja serioze për shëndetin.
“Ka raste, për shembull, që vijnë në gjendje të mirë, por mund të kenë përgjumje. Shenjat e përgjumjes nuk janë pozitive, sepse tregojnë për një vuajtje të trurit. Nëse keni të vjella të vazhdueshme, kjo tregon që ka presione të larta në trup. Po ashtu mund të ketë mpirje të ndonjë gjymtyre apo vështirësi në lëvizje, që tregojnë për fraktura të cilat dëmtojnë palcën ose nervin dhe japin pasoja të rënda”, tha ai.
Respektimi i rregullave të sigurisë rrugore dhe përdorimi i pajisjeve mbrojtëse janë mënyrat më efektive për të parandaluar dëmtimet e rënda dhe për të mbrojtur jetën e përdoruesve të mjeteve me dy rrota.
