Dy autobusë dhe një autocisternë nafte janë përplasur këtë të dielë në provincën Gazni në lindje të Afganistanit. Aksidenti ka qenë i përmasave të jashtëzakonshme, ndërsa më së paku 73 persona kanë vdekur, e dhjetëra të tjerë janë të plagosur.
Dy autobusët mbartnin 125 pasagjerë, dhe shumë prej viktimave, mes të cilëve dhe fëmijë, janë djegur plotësisht, siç e pohon zëdhënësi i Ministrisë afgane të Shëndetësisë.
Drejtimi i pakujdesshëm i mjeteve mendohet të jetë shkaku i aksidentit. Autobusët udhëtonin nga Kabuli për në Kandahar.
Njësi të ushtrisë afgane u kanë ardhur në ndihmë të lënduarve, duke shpëtuar disa prej tyre, por shumë prej të plagosurve janë në gjendje të rëndë.
Gjendja e keqe e rrugëve në Afganistan është një tjetër faktor për aksidente të ngjashme, të ndodhura herë pas here. (javanews /a.r)
