Policia e Tiranës me anë të një njoftimi për media bën të ditur se një aksident ka ndodhur tek pallatet “Malazjane” te kthesa e Kamzës.
Mësohet se një mjeti tip Volksëagen me drejtues shtetasin I.H, ka përplasur shtetasin Xh.K., 77 vjeç së bashku me mbesën e tij, shtetasen A.K., 5 vjeçe.
Në momentin e aksidentit i moshuari bashke me mbesën e tij po kalonin rrugën. Ata janë dërguar në spitalin Ushtarak dhe janë në kujdesin e mjekëve.
Një e afërme e familjes nga Qereka rrëfen për JOQ.al se 77-vjeçari ka thyer brinjët ndërsa e vogla ka pësuar dëmtime në veshka dhe në mushkëri.
Njoftimi i policisë
Tiranë. Informacion paraprak. Më datë 07.10.2017, në numrin e Emergjencave 112, ka ardhur një telefonatë për një aksident tek pallatet “Malazjane” në kthesën e Kamzës.
Janë dërguar në vendgjarje shërbimet e policisë dhe ambulanca, ku nga hetimet paraprake rezulton se shtetasi Xh.K., 77 vjeç së bashku me mbesën e tij, shtetasen A.K., 5 vjeçe kanë qënë duke kaluar rrugën nga njëri krah në tjetrin, kur janë përplasur nga mjeti tip Volksëagen me drejtues shtetasin I.H Shtetasi i moshuar dhe mbesa e tij janë transportuar në spitalin Ushtarak ku ndodhen nën kujdesin e mjekëve.
Është shoqëruar në ambientet e policisë drejtuesi i mjetit ku po kryhen veprimet proçeduriale. /b.d
