Një aksident i rëndë rrugor është regjistruar në aksin nacional Fier-Shegan, në zonën e njohur si Pushimi i Shoferit.
Sipas informacioneve paraprake të siguruar nga gazetarja Anila Sefa, një automjet tip “Benz” dhe një furgon janë përplasur në kryqëzimin e fshatit Toshkëz. Si pasojë e përplasjes së fortë, një person ka mbetur i plagosur rëndë dhe është transportuar me urgjencë drejt Spitalit të Lushnjës.
Pas aksidentit, furgoni ka përfunduar në një kanal anës rrugës. Në vendngjarje kanë mbërritur shërbimet e Policisë Rrugore, të cilat po dokumentojnë rrethanat e aksidentit dhe po punojnë për disiplinimin e trafikut në zonë.
Sipas informacioneve nga Spitali i Lushnjës, i plagosuri, një i moshuar, ndodhet në gjendje të rëndë shëndetësore.
Aksi rrugor Fier–Shegan, në segmentin pranë Pushimit të Shoferit, konsiderohet një nga rrugët me qarkullim të lartë dhe me problematika të shumta sa i përket sigurisë rrugore.
Sipas të dhënave nga terreni, rruga është e ngushtë pavarësisht se ka dy korsi në secilin kah, duke detyruar drejtuesit e mjeteve të ulin shpejtësinë gjatë kryqëzimeve. Gjithashtu, shtimi i fluksit të automjeteve gjatë kësaj periudhe, për shkak të kthimit të emigrantëve, ka bërë që aksidentet rrugore të jenë më të shpeshta.
