Një aksident i rëndë ka ndodhur në autostradën “Ibrahim Rugova” në afërsi të kufirit Kosove-Shqipëri në fshatin Vlashne të Prizrenit në mes dy kamionëve dhe një automjeti.
Katër persona kanë mbetur të lënduar si pasojë e një aksidenti. Ende nuk dihet identiteti i tyre. Zëdhënësi i Policisë së Kosovës Baki Kelani, ka thënë se në aksident janë përfshirë dy kamiona transportues dhe një automjet i vogel.
“Njësitë policore menjëherë kanë dalë në vendngjarje për t’u marrë me rastin si dhe për të hetuar shkaqet dhe rrethanat të cilat kanë çuar deri tek aksidenti. Si pasojë e aksidentit, nga informacionet e para dyshohet për katër persona të lënduar, ku për shkallën e lëndimeve priten konfirmime zyrtare nga mjekët kompetentë”, ka thënë Kelani.
Si pasojë e aksidentit është bllokuar korsia e autostradës e hyrjes për në Shqipëri ku janë krijuar kolona të gjata mjetesh vetëm disa kilometra afër doganës së Morinit. Kolona është e gjatë për shkak edhe të fluksit të mjeteve dhe shtetaseve kosovare që janë nisur mbasdite për në bregdetin shqiptar.
/b.h
