Tri viktima është bilanci i aksidenteve të ndodhura një ditë më parë në Shkodër, dy prej të cilave pikërisht përgjatë aksit Shkodër–Hani i Hotit.
Aksi, edhe këtë fillim, vijon të jetë njollë e zezë aksidentesh.
Mjafton një vëzhgim në këtë segment, ku shihet qartë mungesa e sinjalistikës dhe e mbi-/nënkalimeve për banorët, të cilat kanë shtëpitë në dy anët e rrugës.
Banorët e zonës tregojnë se e kanë të vështirë të qarkullojnë me biçikleta, teksa kërkojnë plotësimin e rrugës me sinjalistikën e duhur.
“Nuk ka rregulla si hyhet, vetëm se ecim në mëshirë të fatit. Kam rrezikuar një herë dhe një djalë i ri me telefon në dorë më tha ‘më fal’,” tregon një banor i zonës.
Sipas policisë vendore në Shkodër vetëm gjatë këtij muaj janë shënuar dhjetëra aksidente me pesë jetë të humbura.
