Akademia e Shkencave e Shqipërisë i ka dhuruar rreth 130 tituj nga botimet e saj për bibliotekën shkencore “Mentor Përmeti” të Universitetit Bujqësor të Tiranës.
Akademik Shaban Sinani, sekretari shkencor i Seksionit të Shkencave Shoqërore dhe Albanologjike, u shpreh se ekziston një shumëllojshmëri midis titujve të dhuruar, jo vetëm me libra dhe botime nga fushat shkencore të cilat studiohen nëpër fakultetet e UBT-së, por dhe tituj të cilat i përkasin fushës së studimeve albanologjike, një aspekt mjaft pozitiv i cili u vjen në ndihmë edhe studentëve të cilëve u interesojnë këta tituj. Ka qenë vetë biblioteka e Universitetit e cila ka shprehur interes dhe për tituj albanologjie, për pasurim të saj.
Zëvendësrektori për shkencën i Universitetit Bujqësor, Prof. dr. Sulejman Sulçe, falenderoi Akademinë e Shkencave për këtë kontribut. Ai përmendi se ky dhurim është mjaft i rëndësishëm për ta, si një hap i mëtejshëm drejt punës së UBT-së për ta rikthyer bibliotekën e saj në gjendjen e dikurshme, kur në fondin e saj ekzistonin rreth 180 mijë tituj botimesh.
Gjithashtu, duke qenë se UBT është në procesin e rehabilitimit të kushteve të studentëve, mundësimi i sa më shumë titujve të disponueshëm në bibliotekë për studentët është vetëm një etapë tjetër e këtij procesi.
Të pranishëm në dhurim ishin dhe akademik Neki Frashëri, kryetar i Seksionit të Shkencave Natyrore dhe Teknike, dr. Albana Velianj, përgjegjëse e Sektorit të Bibliotekës dhe Botimeve Shkencore të ASH, si dhe Renata Bardhi, drejtoresha e bibliotekës shkencore të UBT.
/a.r
