Synimi i Phenianit për të rifilluar dialogun me Korenë e Jugut për përfundimin e Luftës Koreane u njoftua nga Kim Yoo Jong, motra e diktatorit Kim Jong Un. Kim sigurisht vendosi një kusht për koreano -jugorët që të “ndalojnë politikat armiqësore”, por përsëri vendimi i saj është veçanërisht i rëndësishëm.
Çfarë e bëri Phenianin të ndryshojë qëndrimin e tij duke publikuar këtë deklaratë zyrtare të Kim? Ka shumë të ngjarë që presionet akute të ekonomisë gjatë kësaj periudhe të ishin të forta. Miliona njerëz në vend po vdesin nga uria. Por a mjafton që Kim Yoo Jong tregoi një ndryshim qëndrimi dhe jo vetë Kim Jong Un?
Analistët përgjigjen pozitivisht, duke vënë në dukje ndikimin e shtuar që ajo ka tek vëllai i saj në vendimmarrje. Në fakt, ka shumë që besojnë se ajo do të jetë pasardhësja e tij në rast se ai vdes. Kjo grua është ndoshta njeriu më i fortë në Korenë e Veriut tani, komentojnë ata, ndërsa ajo lëviz “fijet” në të gjitha frontet kryesore. Por le të shohim kush është.
Çfarë dimë për Kim?
E lindur në 1987, ajo është motra më e vogël e udhëheqësit të Koresë së Veriut dhe e vetmja nga vëllezërit e motrat e tij, të cilën ai e konsideron si një aleate të ngushtë. Ajo filloi të pushtonte mediat ndërkombëtare në vitin 2018, kur u zgjodh si anëtarja e parë e Dinastisë Kim që vizitoi Korenë e Jugut. Ajo madje mori pjesë në misionin e Lojërave Olimpike Dimërore, ku Koreja e Veriut dhe ajo e Jugut morën pjesë si një ekip i vetëm.
Thuhet se ajo është njeriu që hapi rrugën për takimin e vëllait të saj me Presidentin e Koresë së Jugut Moon Jae-in dhe një seri kontaktesh diplomatike që arritën kulmin në takimin historik të Kim me Presidentin e atëhershëm amerikan Donald Trump.
Në Prill 2020, ajo u kthye në ballë, në një kohë kur vëllai i saj po kalonte një periudhë të gjatë mungese publike, duke shkaktuar kështu një sërë skenarësh për shëndetin e tij. Zhdukja e Kim ishte gjithashtu ajo që e çoi atë në krye të listës së kandidatëve.
Duhet të theksohet se regjimi i Phenianit është jashtëzakonisht i fshehtë dhe kështu që asnjë informacion zyrtar në lidhje me jetën e saj personale nuk është bërë publik. Sidoqoftë, ajo thuhet se është martuar me djalin e Cho Ryong-hae, sekretarit të parë të Partisë Komuniste dhe zyrtarisht nr 2 në hierarki.
Sidoqoftë, ajo që dimë është se ajo kishte jetuar për një kohë në Zvicër, ashtu si vëllai i saj, kur ishte fëmijë. Që nga viti 2014, puna e saj kryesore ka qenë mbrojtja e vëllait të saj: Jo si truprojë, natyrisht, por si personi që është plotësisht përgjegjës për imazhin e tij.
Ajo fillimisht mori drejtimin e departamentit të propagandës së partisë dhe në vitin 2017 u gradua anëtare e Byrosë Politike. Që atëherë, çdo deklaratë dhe paraqitje e vëllait ka vulën e saj.(ABC News)
g.kosovari
