Në një intervistë për New York Post, menjëherë pas kthimit nga Parisi, presidenti i sapozgjedhur amerikan Donald
Trump iu referua bisedës që pati me kryeministren italiane, Giorgia Meloni, në darkën zyrtare të shtruar për liderët nga Emmanuel Macron, në Pallatin Elysee.
“Ne folëm për një kohë të gjatë, është një burim i vërtetë energjie, ju siguroj, është fantastike”, tha Trump për Melonin.
“Ne shkojmë mirë”, citohet të ketë thënë Presidenti amerikan, duke shtuar se grupi i liderëve botërorë në rihapjen e katedrales Notre-Dame de Paris, 5 vite pas zjarrit shkatërrues, ishte një “grup i ngjashëm” me atë të katër viteve më parë kur ai ishte në krye të Shtëpisë së Bardhë, duke theksuar se shpresonte se ata mund ta “ndreqin pak botën”.
Sipas gazetës italiane La Repubblica, Giorgia Meloni pati mundësinë të fliste me Donald Trump tre herë. I pari mes tyre ishte në një diskutim i shkurtër, realizuar në prezencën edhe të presidentin francez dhe presidentes së Gjeorgjisë, Salome Zourabishvili.
“E dyta, pak më vonë, së bashku me Elon Musk dhe e treta, në fund të darkës zyrtare në Elysee, me gota me verë të kuqe në tavolinë”, shkruan La Repubblica.
Ndërkohë, kryeministrja italiane me postimin e saj në internet, nënvizoi nga ana e saj se takimi me Trump “ishte një mundësi e këndshme për dialog”./ b.p
