Air India, e cila nisi operacionet në vitin 1932, ka qenë aktive për më shumë se 90 vjet.
Gjatë kësaj kohe, avionët e saj janë përfshirë në një sërë aksidentesh serioze dhe incidente sigurie. Vetëm vitin e kaluar, u regjistruan katër incidente menjëherë pas ngritjes, megjithatë pa të lënduar.
Aksidentet më të fundit serioze përpara tragjedisë së sotme në Ahmedabad ndodhën në vitet 2010 dhe 2020, por historiku i ngjarjeve të rënda fillon që në vitet 1940. Në një rast, shkaku i katastrofës ishte një sulm terrorist.
Në dhjetor 1947, një avion Douglas C-48C që fluturonte nga Karaçi drejt Mumbait u rrëzua, duke vrarë të 23 personat në bord. Në vitin 1950, një Douglas C-47B u rrëzua në Indi, me pasojë vdekjen e 23 personave të tjerë. Po ashtu, një tjetër avion Douglas C-47A u rrëzua gjatë ngritjes në vitin 1951, duke vrarë një person.
Një tjetër Douglas C-47A u rrëzua në Indi në vitin 1953, duke shkaktuar 18 viktima. Në vitin 1955, kompania u godit nga një tjetër tragjedi kur një pilot u përpoq të hidhte avionin në ujë pasi kishte shpërthyer një bombë në bord – ngjarje që mori jetën e 16 pasagjerëve dhe anëtarëve të ekuipazhit.
Air India ka humbur gjithashtu dy avionë në Zvicër në rrethana të ngjashme. Në vitin 1950, një avion i kompanisë u rrëzua në malin Mont Blanc, duke vrarë të 48 personat në bord. Më 24 janar 1966, një Boeing 707 u rrëzua ndërsa i afrohej Gjenevës, duke shkaktuar vdekjen e të 117 personave në bord.
Një nga tragjeditë më të mëdha në historinë e kompanisë ndodhi më 1 janar 1978, kur një Boeing 747 që fluturonte nga Mumbai drejt Dubait u rrëzua në Detin Arabik. Avioni u rrëzua më pak se dy minuta pas ngritjes për shkak të një treguesi të dëmtuar që çoi në një keqinterpretim të drejtimit nga kapiteni. Ngjarja, që ndodhi gjatë natës, shkaktoi vdekjen e të 213 personave në bord.
Katër vjet më vonë, më 21 qershor 1982, një Boeing 707 u rrëzua teksa përpiqej të ulej në Mumbai në kushte të motit të keq. Dështimi i uljes bëri që avioni të përplasej me pengesa dhe të merrte flakë, duke vrarë 17 nga 111 personat në bord.
Një tjetër ngjarje e rëndë në historinë e Air India ndodhi më 23 qershor 1985, kur Fluturimi 182, një Boeing 747 që po fluturonte nga Montreali për në Delhi me ndalesë në Londër, shpërtheu në ajër pranë brigjeve të Irlandës. Shpërthimi u shkaktua nga një bombë e vendosur nga ekstremistë sikh. Të gjithë 329 personat në bord, përfshirë 268 shtetas kanadezë, humbën jetën.
Në maj të vitit 2010, një Boeing 737-800 i Air India Express doli nga pista gjatë uljes në Mangalore dhe u rrëzua në një grykë, duke shkaktuar vdekjen e 158 personave. Ky aksident çoi në rishikimin e protokolleve të sigurisë së fluturimit në Indi.
Dhjetë vjet më vonë, në gusht 2020, një tjetër Boeing 737-800, i Air India Express, doli nga pista gjatë motit me shi të rrëmbyeshëm në Karipur. Avioni u nda në dy pjesë dhe 21 nga 190 personat në bord humbën jetën, përfshirë dy pilotët.
