Kryetari i Bashkimit Demokratik për Integrim, Ali Ahmeti, në një intervistë ekskluzive për programin “Zigzag” të Televizionit Art të Tetovës, ka folur për marrëveshjen, me ndërmjetësim ndërkombëtar, të firmosur nga katër liderët e partive politike që pritet t’i japë fund krizës shumëmujore në Maqedoni.
Me këtë rast Ahmeti ka çmuar rolin vendimtar, siç është shprehur, të Bashkimit Evropian dhe Shteteve të Bashkuara.
“Mund të quhet lirisht një marrëveshje me peshë të rëndësishme, po pse të mos thuhet edhe historike, sepse për vendin hapet një kapitull i ri për rregullimin e shumë çështjeve që mbase edhe më herët kanë kërkuar zgjidhje, por ka patur hezitime nga njëra apo tjetra palë. Ta zëmë, shumë e levërdishme dhe demokratike për vendin është që tre muaj para zgjedhjeve, kryeministri i cili është edhe kryetar partie, të japë dorëheqje dhe të garojë si i barabartë në mesin e të barabartëve. Ky moment parashihet në këtë marrëveshje që ne e kemi firmosur”, tha Ahmeti duke saktësuar se ky përcaktim tash e tutje do të bëhet rregull.
I pyetur, se sa janë të vërteta spekulimet se në raundin e dështuar të Brukselit, ka mbajtur anën e Gruevski, karshi Zaevit, Ahmeti ka thënë se nuk është e vërtetë se ka mbajtur anë.
