Nga 1 gushti, Ministria e Financave nis në të gjithë vendin fushatën ndërgjegjësuese për kuponin tatimor.
Një ditë para aksionit të kuponit tatimor, ministri i Financave, Arben Ahmetaj, i është drejtuar administratës tatimore dhe biznesit me një letër, ku garanton se fushata nuk ka qëllimi vendosjen e gjobave.
Në letrën e hapur dërguar inspektorëve të terrenit dhe administratës tatimore, duke folur për pritshmëritë e kësaj fushate, sqaron se ajo do të jetë edukuese dhe sqaruese, si dhe i kërkon administratës të tregojë profesionalizëm.
“Dëshiroj të ndaj me ju mesazhin tim shumë të qartë dhe të panegociueshëm se objektivi ynë nuk është të vendosim gjoba, objektivi ynë është të ndihmojmë tatimpaguesit me durim, modesti dhe profesionalizëm që të zbatojnë detyrimin ligjor.
Vulgariteti dhe mungesa e modestisë është armiku kryesor i suksesit të institucioneve tona. Mos harroni në asnjë moment që, sado gabim që të jetë, sipërmarrja meriton të ndihmohet, për shkak të të gjithë risqeve që ka ndërmarrë në vite”, thuhet në letrën dërguar Drejtorisë së Përgjithshme dhe atyre Rajonale.
Sipas Ministrisë së Financave, fushata do të shtrihet në të gjithë vendin, me një fokus të veçantë në zonat turistike për shkak të përqendrimit më të madh të aktivitetit të biznesit dhe pushuesve në këtë sezon. Kreu i Financave, Ahmetaj, fton biznesin të bashkëpunojë me administratën tatimore.
“Detyra jonë është të jemi këmbëngulës në zbatueshmërinë e ligjit, por jashtëzakonisht shumë modestë dhe bashkëpunues me biznesin, sepse në këtë betejë, ne dhe sipërmarrja qëndrojmë në një anë. Fatura dhe kuponi tatimor janë institucione mbi të cilat ndërtohet buxheti i shtetit.
Beteja jonë është ta kthejmë faturën dhe kuponin tatimor në institucione të normës të përditshme në jetën e sipërmarrjes dhe qytetarëve.
Tashmë, ne kemi një eksperiencë të mirë nga viti i kaluar. Unë ju ftoj ta përmirësojmë atë eksperiencë e në bashkëpunim të ngushtë me qytetarët dhe bizneset të ndërtojmë një realitet të ri të zbatimit të ligjit”, shprehet në letër Ahmetaj.
Ministri i Financave ka theksuar se ekonomia ka lënë pas krizën dhe është orientuar drejt trendit të konsoliduar të rritjes ekonomike, që në 3- mujorin e parë të vitit ishte 3 për qind.
Panorama/d.i.
