Anëtari i Kryesisë së Partisë Socialiste Arben Pëllumbi ka folur përmes një lidhjeje Skype për Klan News, sa i takon hetimit që SPAK ka nisur ndaj Arben Ahmetaj.
Pëllumbi u shpreh se PS mban të njëjtin qëndrim dhe se përgjegjësia e secilit është plotësisht personale para ligjit.
“Sapo u njoha nga ju për këtë lajm, qëndrimi ynë është ai që ka qenë gjihmonë që PS nuk bëhet mburojë e askujt dhe secili të gjejë avokat në rast se ka bërë një shkelje. Përgjegjësia është personale, nëse ka shkelur ligin duhet të përballet i vetëm. Secili duhet të ketë si busull ligjin, në rast se e ka shkelur është për t’u përballur personalisht, PS ka pasur një qëndrim të qartë me reformën në drejtësi dhe më vjen shumë mirë që këto organe veprojnë. Sa i takon hetimit i takon drejtësisë dhe jo ne politikanëve të flasim. Busull duhet të jetë ligji. Në fakt e gjithë reforma në drejtësi synon pikërisht këtë gjë. Suksesi që realizohet nuk është individual, ka të bëjë me një program të caktuar. Në rast se bën shkelje të caktuar, organet ligjzbatuese e shikojnë nëse ke bërë ndonjë shkelje në veprimtarinë politike, nuk ka të bëjë me forcën politike në terësi.”
Për mungesën e Ahmetaj në mbledhjen e fundit të Kryesisë së PS, Pëllumbi nuk dha një arsye konkrete, por theksoi se Ahmetaj ka qenë i pranishëm në të gjitha seancat parlamentare.
“Në mbledhjen e fundit munguan disa kolegë dhe kolege që për arsye të caktuara, në seancat parlamentare zoti Ahmetaj ka qenë prezent.”
I pyetur se a beson në pafajësinë e kolegut socialist, Pëllumbi deklaroi se dëshira e tij është që ligji të zbatohet në mënyrë rigoroze.
“Nuk na vjen mirë që përfaqësues tanë të përballen me ligjin, por nga ana tjetër ky ishte qëllimi i reformës në drejtësi, ndaj i kemi ndërtuar këto organe të reja për të luftuar elementët korruptivë. PS nuk mbron askënd para drejtësisë.”
Në përfundim, ai u shpreh optimist për zgjedhjet lokale të 14 Majit duke thënë se PS do sigurojë fitore në shumicën e bashkive dhe se me hetimin e deklarimeve të secilit kandidat do të merret drejtoria përkatëse në SPAK.
“Sigurisht mund të ketë filtra, por ne jemi forcë politike jo shërbimet sekrete. Është në tagërin e secilit prej nesh që të jemi kandidatë për një post, që të kemi të gjithë integritetin moral para atyre që na propozojnë që të bëjmë një deklarim të saktë. Ne kemi ndërtuar brenda SPAK një drejtori të caktuar që duhet të hetojë të gjitha deklarimet e kandidatëve, por në një kohë të shkurtër për shkak të numrit të kandidatëve është e pamundur. Përtej strukturave tona lokale, s’kemi mundësi më të mëdha për të thelluar hetimet.”
/e.d
