Qeveria ndryshon një nga postet më të rëndësishme: ministrin e Financave. Vendin e Shkëlqim Canit, një financieri me përvojë e zë nje nga emrat e rinj të socialistëve, Arben Ahmetaj.
Mes hezitimeve të Presidentit, akuzave të rënda të opozitës, kritikave për Canin, marrëveshje me FMN dhe shenjave të para të vakta të rimëkëmbjes së ekonomisë, cili është plani i mbajtësit të ri të thesarit të vjetër të shtetit?
Për këtë dhe për të tjera pyetje, në Top Story-n e kësaj të hëne ishte vetë ministri (i padekretuar) i Financave…dhe pikërisht mungesa e dekretimit nga ana e Presidentit ishte çështja nga ku e nisi ai fjalën e vet.
“Presidenti ndoshta po konsumon të gjithë kohën kushtetuese, ose ndoshta gjysmën e afatit 7-ditor. Nuk besoj që do të ketë krizë kushtetuese. Unë kam qenë edhe para një viti tek Presidenti dhe presidenti në të njëjtën kohë bëri shkarkimin dhe emërimin në atë kohë, çoi të dyja dekretimet në Parlament. Nuk besoj që kemi një situatë krize kushtetuese. Jam i bindur që Presidenti i kupton që financat e shqiptarëve janë delikate dhe nuk kanë nevojë për trazira”, tha Ahmetaj.
Lidhur me akuzat e Sali Berishës dhe opozitës për afera korruptive, akuza që kulmuan në seancën plenare të kësaj të enjteje:
“Berishën e shqetëson përmirësimi i ekonomisë së vendit, kjo e shqetëson se nga përvoja politike e di që përmirësimi i ekonomisë largon administratorin e tij nga ëndrra e pushtetit. Nuk bën dot asnjë akuzë konkrete, por merret me një çështje të një kompanie private para 16 vitesh, të cilën kur erdhi në pushtet e ka hetuar me themel me grupin e vet antikorrupsion. E çoi në prokurori, kontrolloi të gjitha të ardhurat e mia me ILDKP dhe bëri denoncimin në prokurori dhe nuk ishte prokurori i PS, ishte prokuror i vendosur nga Sali Berisha. Unë isha një person privat me të ardhura dhe shpenzime të deklaruara kokë për kokë”, deklaroi ai.
Top Channel
