Arben Ahmetaj, ministri i Zhvillimit Ekonomik, Turizmit, Tregtisë dhe Sipërmarrjes, në një deklaratë për mediat sqaroi se borxhi 1.2 miliardë dollarësh nga BB, është një sinjal i mirë për ekonominë tonë.
“Bordi i Bankës Botërore vlerësoi angazhimin e thellë të qeverisë në mbështetje të reformave që duheshin nisur kohë më parë. Ky është një lajm shumë i mirë për ekonominë. Këto fonde ofrohen me interesa tepër të vogla dhe do të mundësojnë avancimin e reformave në mbështetje të zhvillimit të qëndrueshëm”, tha ministri Ahmetaj.
Ahmetaj theksoi se përmirësimi i klimës së biznesit është element kyç i progamit që do mbështesë BB.
“Përmirësimi i klimës së biznesit është element kryesor i programit që do të mbështetet nga Banka Botërore. Shqipëria do të bëhet një vend më tërheqës për investitorët e huaj me ligjin e turizmit dhe ligjin e investimeve strategjike që ofron garanci maksimale juridike për ta”, nënvizoi Ahmetaj.