Ministri i Financave, Arben Ahmetaj, tha dje në Komisionin e Ekonomisë se Rruga e Arbrit do të ndërtohet me koncesion dhe brenda muajit maj do të përfundojë vlerësimi i ofertave të ardhura nga investitorët privatë.
Duke iu përgjigjur pyetjes së deputetit të LSI-së, Përparim Spahiu, për mosparashikim të fondeve në buxhetin e vitit të ardhshëm për këtë rrugë dhe kur oferta e kompanisë kineze për koncesion dështoi, ministri i Financave u shpreh se oferta e kompanisë kineze u refuzua, pasi ishte në kundërshtim me interesin publik.
“Në Ministrinë e Transporteve ka filluar një proces partneriteti publik-privat dhe ka avancuar me krijimin e komisionit. Unë besoj se deri në maj të vitit 2017, procedura të ketë mbaruar dhe në terren shpresoj të kenë filluar punimet. Pra, brenda Ministrisë së Transporteve ka një proces konkret të filluar për partneritet publik-privat dhe ka oferta të pakërkuara konkrete të depozituara me projekte të detajuara në Ministrinë e Transporteve. Ka pasur një përgjegjshmëri maksimale nga ana e qeverisë për ta rrëzuar ofertën e kompanisë kineze, që ishte në kundërshtim me interesin publik”, u shpreh Ahmetaj.
Ndërsa deputeti Pjerin Ndreu kërkoi që qeveria të përfshijë në fondet e buxhetit të ri edhe financime për Rrugën e Kombit. “Qeveria e kaluar nuk ka bërë asnjë investim, as nga hyrja e Vaut të Dejës, as nga Repsi. Hyrja nga Rruga e Kombit ka më shumë impakt se prek jo vetëm Pukën, por edhe Tropojën, nëse qeveria e ka në plan dhe si mund të bëhet i mundur realizimi i kësaj rruge”, tha Ndreu.
Ministri i Financave tha se kostoja totale për përfundimin e Rrugës së Kombit llogaritet 150 milionë euro.
“Rrugës së Kombit, për të arritur standardin e kërkuar në inicim, i duhen 130 milionë euro deri në 150 milionë euro akoma. Pra, që të kapë standardin dhe të quhet rrugë e mbaruar duhen 130-150 milionë euro. Rruga që ju i referoheni është përfshirë për financim 35-40 për qind e kostos totale vetëm për vitin tjetër”, tha Ahmetaj. Ministri i Financave, Ahmetaj, tha gjithashtu se nuk do të lejohen më hapje të projektit të investimeve, në rast se nuk financohet 20 për qind e kostos totale të projektit.
“Në bazë të ligjit organik të buxhetit, nuk lejohet më hapje të projektit pa alokuar në vitin korrent, të paktën 20 për qind të kostos totale, në mënyrë që rrugët dhe investimet të mos bëhen më virtuale, si në këto raste që unë i kam me vite, por të jemi të garantuar që rruga që fillon, përfundon brenda 3-4 vjetësh në rastin më të keq”, tha Ahmetaj. Ministri i Financave solli në vëmendje për deputetët projektet problematike të së kaluarës me vlerë të lartë, por që hapen në shuma minimale dhe janë ende të papërfunduara.
“Rrugët virtuale që Sali Berisha i ka quajtur të përfunduara si rruga bypass Plepa- Rrogozhinë, loti 11, vlera e plotë e projektit ishte 6 milionë dollarë, vlera e financimit për 2013 ka qenë 1000 mijë dollarë. Ndërtimi i Unazës së Jashtme së Tiranës, pjesa verilindore, vlera e plotë 10 miliardë lekë, vlera e financimit 3 mijë dollarë për hapjen Unazës. Ndërtimi i rrugës Lushnjë-Berat, loti i dytë dhe i tretë, me vlerë 4,3 miliardë lekë, vlera e financimit 2 mijë dollarë”, u shpreh ministri.
ma.me
