Ministri i Financave, Arben Ahmetaj deklaron se ekonomia shqiptare vijon qëndrueshëm rritjen dhe konsolidimin, duke treguar çdo ditë e më shumë sinjale pozitive. Të dhënat e fundit të Bankës së Shqipërisë, thotë ai, konfirmojnë rritjen për të pestin muaj rresht të kredisë për ekonominë.
“Pas përmirësimit të treguar nga indikatorët e konsumit, tregtisë me pakicë, si dhe përmirësimit të treguesit të ndjesisë ekonomike, që mat besimin e biznesit dhe konsumatorit në ekonomi, ky është një tjetër tregues i rëndësishëm që mbështet rritjen e qëndrueshme ekonomike dhe arritjen e pritshmërive tona për 3.4% rritje reale për vitin 2016”, shkruan në një postim në rrjetin social ministri Ahmetaj.
Sipas tij, programi i mbështetjes së Agrobiznesit në Shqipëri i sapo iniciuar me BERZH dhe bankat e nivelit të dytë, është një tjetër faktor i rëndësishëm që do të vazhdojë ndikimin pozitiv ndaj kreditimit për njërin nga sektorët kyçë të ekonomisë.
BW/d.i.
