Menaxhimi i borxhit publik nga qeveria u shoqërua me debate në Komisionin Parlamentar të Financave mes ministrit të Financave Arben Ahmetaj dhe opozitës.
Ministri Ahmetaj duke prezantuar strukturën e borxhit publik para deputetëve tha se ka filluar një trajektore e uljes së borxhit dhe se nga mirëmenaxhimi i tij janë kursyer 20 milionë euro, shifër kjo që sipas tij ka shkuar drejtpërdrejt për investime publike ose në ulje të borxhit publik.
“Qëndrimi ndaj borxhit është sa fiskal edhe politik, është përgjegjshmëri e drejtpërdrejtë politike. Nuk është thjesht qëndrim fiskal është koncept politik, pasi borxhi i lartë përbën risk për ekonominë, financat publike dhe qytetarët”, deklaroi Ahmetaj.
Borxhi, sipas kreut të financave publike, është një komponent i integruar brenda financave publike dhe që prek drejtpërsëdrejti të gjithë ekonominë dhe kur risku është ulur atëherë pjesa tjetër e ekonomisë përfiton.
“Thelbi është ulja e risqeve në total që sjell drejtpërsëdrejti një reflektim stabël të territorit ekonomik. 766 ditë është maturimi, nuk ka alarm siç ka patur brenda buxhetit të shtetit dhe ministrisë së Financave”, shtoi ministri.
Ahmetaj tha se investitorët kanë shprehur besim tek konsolidimi që kemi vendosur dhe për të cilin po punojmë. “Reflektimi në kosto, interesa e maturitet, në ditë maturimi, janë element e statistika të rëndësishme, cilësore”, nënvizoi ai.
Ndërsa deputeti i partisë Demokratike, Edmond Spaho tha se shifrat e dhëna nga ministri për defiçitin dhe borxhin janë jo reale. Ministri tha ai, e paraqet si sukses që defiçiti për vitin 2017 prej 2 %. “Po ta shikosh thjeshtë duket si sukses fakti që po mbajmë një defiçit prej 2 % , por po të shikojmë edhe faqen tjetër dhe të gjejmë arsyet se pse qeverisë i është imponuar ky nivel për vitin 2017 del se është pamundësia për të mbledhur të ardhurat”, deklaroi Spaho.
Sipas tij, kjo qeveri në tre vite tregoi se është e pa zonja për të mbledhur të ardhura, megjithëse ka rritur me 390 milionë dollarë taksat në këtë periudhë. “E gjithë rritja e taksave ka shkuar evazion fiskal, cigare, karburant, keqadministrim, e për rrjedhojë është e detyruar të bëjë kufizime në shpenzime, imponuar kjo nga FMN-ja”, deklaroi Spaho.
Ndërsa deputeti socialist, Anastas Angjeli tha se nëse ka më pak borxh e defiçit dhe nëse mbajtja nën kontroll nuk ka ndikuar negativisht në ekonomi dhe kemi një propozim për ulje për disa vite në vazhdim të defiçitit buxhetor, do të thotë se kemi të bëjmë me një mirëmenaxhim të tij dhe tregon një seriozitet në përpjekjen e asaj çështje që quhet themelore në financat publike, për stabilitetin dhe konsolidimin fiskal.
“Nëse ne e analizojmë në këtë këndvështrim unë jam i sigurtë se i japim një mesazh sot qytetarëve se si ne po i menaxhojmë financat publike. Për ne si ligjvënës ka shumë rëndësi të bëjmë një ballafaqim midis detyrimeve ligjore dhe p/buxhetit që paraqitet për defiçitin dhe borxhin”, deklaroi Angjeli.
Për deputetin e Partisë Socialiste, Ervin Bushati, kemi të bëjmë padyshim me një menaxhim më të mirë të borxhit. “Inversioni ku periudha rollover ishte me rënie dyfish dhe në të njëjtën kohë përputhej fiks me rënien e interesave është domethënëse”, deklaroi ai.
Defiçiti buxhetor për vitin 2017 planifikohet të jetë në nivelin 2.0% të PBB. Për të dytin vit rradhazi balanca primare parashikohet të jetë pozitive në nivelin 0.7% duke shënuar nivelin më të lartë në 25 vite. Rrjedhimisht, niveli i borxhit publik të targetuar, do të ulet me rreth 2.7 pikë përqindje dhe do të vijojë këtë trend rënës në periudhën afatmesme dhe afatgjatë. Ligji vjetor i buxhetit 2017 targeton një nivel të borxhit publik total në 69.1% të PBB nga niveli prej 71.8% e PBB i targetuar për vitin 2016./a.m.
