Kauza e Partisë Agrare Ambientaliste është mjedisi, deklaroi sot nga Durrësi kreu i kësaj force politike, Agron Duka, gjatë një takimi me strukturat e reja me synimin riorganizimin e tyre.
Duka tha se pranë PAA janë afruar figura të shquara, me eksperiencë të lakmueshme në fushën e mjedisit dhe agrokulturës, të cilët janë duke punuar për programin politik.
Në fjalën e tij, Duka theksoi se rinia dhe gruaja janë shumë të rëndësishëm për Partinë Agrare Ambientaliste.
“Rreth Partisë Agrare janë afruar shumë figura të cilët janë specialistë të bujqësisë dhe me të cilët ne kemi krijuar disa departamente që do të udhëheqin punën në drejtime të caktuara. Këta janë njerëz me begraund shumë pozitiv dhe që do të bëjnë një program profesional që unë mendoj se do të jetë më i realizueshëmi dhe më reali nga të gjithë partitë e tjera të cilat nuk kanë në fokus problematikat që kemi ne, por që kanë të tjera fokuese, pavarësisht se mundohen për bujqësinë para zgjedhjeve. Ne këtë e kemi qëllim gjatë gjithë kohës” u shpreh kryetari Agron Duka.
Në fund të takimit u lanë edhe detyrat për të gjitha grupet e punës, të cilët u njohën me skemën e re të organizimin dhe formularët e anëtarësimit në këtë forcë politike. Po ashtu të pranishmit në këtë takim u njohën edhe me platformat online të PAA në të cilat mund të bëhen pjesë aktive.
