Trajneri italian i Skënderbeut, Andrea Agostineli, ka dhënë një intervistë për “Supersport” ku ka folur për takimin e radhës në Superiore, atë ndaj Flamurtarit. Ai gjithashtu komentoi edhe situatën e krijuar pas ndeshjes me Partizanin si dhe e cilësoi të padrejtë vendimin e Komisionit të Disiplinës për të dënuar me 3 ndeshje pa tifozë ekipin korçar.
Për ndeshjen ndaj Flamurtarit
“Çdo ndeshje ka karakteristikat e saj. Tradita na tregon që për ne Flamurtari është një kundërshtar i vështirë pasi na ka krijuar probleme. Jemi përgatitur si zakonisht, me shumë dëshirë për të zhvilluar një ndeshje pozitive.”
Për ngjarjet në ndeshjen ndaj Partizanit dhe vendimin e Disiplinës
“Nuk jam unë njeriu i duhur për të bërë komente rreth kësaj çështjeje. Nga ajo që unë pashë, tifozët tanë janë viktimat e vetme të kësaj ngjarjeje. Ndeshjet me Partizanin janë përherë të tensionuara. E përsëris është se ajo që ka ndodhur tashmë nuk më intereson. Ne kemi mbyllur fazën e parë në vendin e parë të klasifikimit dhe duam të qëndrojmë deri në fund në këtë pozicion.
Përsa më përket, mund të them se nëse në fillim të sezonit do të më thonin se do të qëndronim në krye, do të ishim të kënaqur. Më vjen keq që nuk do të kemi mbështetjen e tifozëve për tre ndeshje sepse kjo do të peshojë te skuadra. Është një vendim i padrejtë.”
Për akuzat e Partizanit
“Më duhet të them se kur shfletoj gazetat, shikoj vetëm fotot dhe nuk arrij të kuptoj saktësisht atë që shkruhet. Mua më duhet të ritheksoj se mendoj që tifozët tanë u sulmuan dhe nuk janë ata që provokuan. Unë qëndroj në pankinë dhe nuk e di se çfarë ka ndodhur jashtë stadiumit.”
Për takimin me presidentin Takaj
“Presidenti na karikoi. Na ka theksuar se do diçka më shumë nga skuadra. Ne pikët i kemi grumbulluar por kemi ende shumë gjëra për të përmirësuar. Ishte një takim mes stafit dhe lojtarëve, ashtu siç ndodh rëndom në çdo familje.”/a.k
