Po ngjallin reagime të shumta fjalët e ish-kryeministrit italian dhe lider të partisë në koalicionin qeverisës, Forza Italia, ndaj presidentit ukrainas Volodymyr Zelensky.
Duke komentuar takimin e kryeministres Giorgia Meloni me Zelensky në Bruksel, politikani miliarder u shpreh se “të isha unë lider, nuk do ta takoja kurrë Zelensky-n. Jemi dëshmitarë të shkatërrimit të vendit të tij dhe masakrës së ushtarëve dhe popullsisë. Do të kishte mjaftuar që mos të sulmonte republikat në Donbas dhe kjo nuk do të kishte ndodhur, prandaj e gjykoj atë person në mënyrë shumë negative”.
Menjëherë, deklarata pati reagime të shumta, brenda dhe jashtë vendit. Fillimisht, nga vetë aleatja e tij Meloni, e cila është rreshtuar që në ditën e parë afër Kievit. Kryeministrja e parë e historisë italiane madje dëshiron të niset sa më shpejt në drejtim të kryeqytetit ukrainas për të dëshmuar që pozicioni italian nuk ka ndryshuar dhe që flitet për mendimin personal të 86-vjeçarit, miqësia e të cilit me presidentin rus Vladimir Putin është e gjatë dhe solide. Por ndërkohë përgjigjja e Kievit nuk mungon, me anë të këshilltarit personal të Zelensky, Mykhailo Podolyak. “Berlusconi është një agjitator vip që vepron në kuadër të propagandës ruse, po shet reputacionin e Italisë për miqësinë me Putin. Fjalët e tij janë të dëmshme për Italinë”, deklaroi ai që shtoi se Berlusconi “duhet të hedhë maskën dhe të thotë që është pro gjenocidit të popullit ukrainas”.
/a.r
