Seanca parlamentare Kosovë-Shqipëri pritet t’i bëjë bashkë dy qeveritë. Salla e seancave plenare e Kuvendit të Kosovës do të presë të premten e 20 dhjetorit, deputetët e Shqipërisë të cilët do të bashkohen në mbledhjen e dy kuvendeve. Të dy vendet kanë për synim agjendën e përbashkët evropiane.
Por nuk ka shumë pritje nga kjo seancë, megjithatë të dy shtetet mbesin të lidhur me njëri-tjetrin, pavarësisht politikave ditore.
I vetmi vend ku ekzekutivi i Prishtinës dhe ekzekutivi i Tiranës japin llogari janë parlamentet e tyre. Parlamentet tona, të Kosovës dhe të Shqipërisë janë të pafuqishme para kryeministrave, prandaj në këtë rast takimi shikohet si një takim i munguar, nga një anë tjetër edhe një lloj karshillëku përballë asaj që po bëjnë serbët në “botën serbe” që bënë mbledhjen e përbashkët të kuvendarëve të Republikës Serbe të Beogradit dhe të serbëve të Malit të Zi.
Sa i përket atyre që publiku pret që të dyja parlamentet të jenë shumë të integruar me njëri-tjetrin, të ndihmojnë njëri tjetrin, kjo gjë është ende larg.
Mbledhja e dy kuvendeve, sipas institucioneve në të dy anët e kufirit, vjen si nevojë e koordinimit të agjendës për realizimin e synimeve që përfshijnë anëtarësimin e Shqipërisë në Bashkim Evropian dhe integrimet euro-atlantike të Kosovës. Gjithashtu, mbrojtjen dhe avancimin e të drejtave të shqiptarëve.
Në këtë mbledhje, të pranishëm pritet të jenë edhe kryeministrat, Albin Kurti dhe Edi Rama.
Të dy qeveritë tashmë kanë të nënshkruara dhjetëra marrëveshje, por takimet ndërqeveritare nuk janë duke u mbajtur.
I fundit që kishte dështuar të mbahet ishte në qershor të vitit 2023, pas mospajtimeve në mes të Kurtit dhe Ramës.
