Drejtori ekzekutiv i Agjencisë Shqiptare për Zhvillimin e Investimeve, AIDA, Genti Beqiri, ka hedhur poshtë deklaratat e bëra nga deputetja e Partisë Demokratike Jorida Tabaku lidhur m rënien sipas saj të investimeve të huaja në vend. Sipas Beqirit, fluksi hyrës i Investimeve të Huaja Direkte në Shqipëri ka ruajtur një trend rritës pozitiv gjatë viteve dhe se për vitin 2015, referuar të dhënave të Bankës së Shqipërisë, Shqipëria ka thithur më shumë investime te huaja krahasuar me vitin e kaluar, duke ruajtur këtë trend.
“Konkretisht prej vlerës 869 milionë Euro në vitin 2014, flukset e IHD-ve në 2015 shkuan në vlerat 890 milion Euro. Pra për vitin 2015, kemi një rritje të vlerës së IHD me 21 Mil. Euro ose rreth 2.4 % krahasuar me vitin 2014. Investimet e huaja direkte, në vitin 2015, mbulojnë 11.6 % të PPB . Për tremujorin e III-të të vitit 2016, Fluksi i Investimeve të Huaja Direkte është 286 milionë Euro, me një tendencë rritjeje me 12%, krahasuar me fluksin prej 255 milionë Eurosh të së njëjtës përiudhë të vitit 2015. Fluksi i Investimeve të Huaja për tremujorin e III-të të vitit 2016 ka pasur një rritje prej 10% krahasuar me tremujorin e II-të dhe një rritje prej 85% krahasuar me tremujorin e I-rë të vitit 2016. Gjithashtu magnituda e indikatorëve të IHD-ve kundrejt PBB-s është rritur në 11.6% për vitin 2015, nga 8.7% që ishte në vitin 2014”, thekson Beqiri.
Për sa i përket Stokut të Investimeve, për vitin 2015, ai ka pësuar një rritje prej 9.6% krahasuar me vitin paraardhës, duke arritur në vlerën e 5,005 milion Euro, nga 4,565 milion Euro që shënonte në vitin 2014. Beqiri nënvizon se ndonëse investimet e huaja direkte në Shqipëri janë një fenomen i kohëve të fundit dhe shumica e stokut është akumuluar vetëm në 10 vitet e fundit, ndërkohë që vendet e tjera kanë tërhequr IHD për një periudhë të gjatë kohe, Stoku është rritur ndjeshëm.
“Në vitet e fundit, Shqipëria ka tejkaluar vendet e tjera në tërheqjen e IHD-ve, duke marrë parasysh madhësinë e ekonomisë. Kështu në krahasim me Maqedoninë, fluksi i IHD në Shqipëri në 2013-2015 ishte pothuajse pesë herë më i madh në terma absolutë, duke sjellë Shqipërinë më afër vendeve të tjera të Ballkanit Perëndimor në lidhje me stokun e investimet e huaja direkte (investimet e akumuluara hyrëse). Referuar të dhënave zyrtare të QKB, rezulton se për vitin 2016 janë regjistruar rreth 1,323 kompani të cilat janë aktive dhe operojnë në sektorë të ndryshëm të ekonomisë shqiptare dhe origjininën e investimit e kanë nga Italia, Greqia, Turqia, etj. Krahasuar me vitin paraardhës kemi një rritje prej 25%, ndërsa krahasuar me vitin 2014 rritja është 43%”, deklaroi Beqiri.
ma.me
