Agjencia e Trajtimit të pronave njoftoi se ka aplikuar për shtatë raste të kërkesave të ish-pronarëve shpërndarje fondi kompensimi në përgjigje të një kërkese të veçantë. Sipas njoftimit, nga 66.6 milionë lekë, që duhej të merrnin këta pronarë sipas ligjit të vjetër, ata do të përfitojnë vetëm 8 milionë lekë, ose 8 herë më pak.
Formula
Sipas Ligjit 133/2015, datë 5 dhjetor 2015, nga fondi vjetor buxhetor i kompensimit financiar, 1/3 e fondit të grumbulluar në një vit nga ATP mund të përdoret për rastet e kërkesave të veçanta për kompensim financiar.
Po çfarë janë kërkesat e veçanta?
Ky ligj për herë të parë vendosi një formulë të re për ata ish-pronarë, që pranojnë edhe një shifër të reduktuar kompensimi. Formula është si më poshtë.
Subjektet, që shprehin vullnetin për t’u kompensuar financiarisht me kërkesë të veçantë, mund të përfitojnë nga ky fond, kur subjekti kërkon të kompensohet financiarisht brenda një viti, atëherë ai përfiton 20 për qind të vlerës së kompensimit dhe heq dorë nga pjesa tjetër e kësaj vlere.
Kur subjekti kërkon të kompensohet financiarisht brenda 3 vitesh, atëherë ai përfiton 30 për qind të vlerës së kompensimit dhe heq dorë nga pjesa tjetër e kësaj vlere. Ndërsa, kur subjekti kërkon të kompensohet financiarisht brenda 5 vitesh, atëherë ai përfiton 40 për qind të vlerës së kompensimit dhe heq dorë nga pjesa tjetër e kësaj vlere.
Një pjesë e ish-pronarëve, duke u nisur nga përvoja e hidhur gati 30-vjeçare e vonesave të shtetit shqiptar në përfundimin e procesit të kompensimit fizik apo financiar të tyre, kanë vendosur më së fundi të shfrytëzojnë këtë formulë, të kompensimit të reduktuar, për të arritur të marrin kompensimin për pronat e njohura.
Pronarët
Agjencia e Trajtimit të Pronave njofton se më datë 3 gusht 2017 ka përfunduar procesi i shqyrtimit të kërkesave të pronarëve për kompensim financiar me kerkesa të veçanta bazuar në nenin 17 pika 2, të ligjit nr. 133/2015 “Për trajtimin e pronës dhe përfundimin e procesit të kompensimit të pronave” dhe Kreu IV, të Vendimit të Këshillit të Ministrave nr.223, datë 23.03.2016 “Për përcaktimin e rregullave dhe procedurave për vlerësimin dhe shperndarjen e fondit financiar dhe fizik për kompensimin e pronave” (i ndryshuar), vendimit të Këshillit të Ministrave nr.221, datë 23.03.2016 “Për mënyrën e organizimit dhe të funksionimit të Agjencisë së Trajtimit të Pronave”.
ATP bën me dije se aktualisht ka përfunduar shqyrtimin e disa aplikimeve me objekt kompensimin financiar me kërkesë të veçantë dhe me anë të vendimeve të saj ka miratuar pranimin e shtatë kërkesave të paraqitura nga subjektet e shpronësuar për kompensim financiar me kërkesë të veçantë.
Nga aplikimet e shqyrtuara deri më tani, rezulton se për gjashtë aplikime, vendimet e të cilave përfitojnë kompensim financiar, për një aplikim është vendosur përfundimi i procedimit administrativ.
Bazuar në të dhënat e vendimeve, që kanë njohur të drejtën e kompensimit subjekteve të shpronësuar, shuma totale që do të shpërndahet është 8.046.499 lekë, fond, i cili do të mbulohet nga Buxheti i Shtetit.
Për këto aplikime, si rrjedhojë e implementimit të formulës së kompensimit, të miratuar në Ligjin nr. 133/2015, buxhetit të shtetit i kursen një shumë prej 58.512.447 lekë. Pra, me ligjin e vjetër, këta pronarë duhej të merrnin 66.558.946 lekë, ose tetë herë më shumë.
ma.me
