Afera me CEZ, Basha: Presim nga Kuvendi votë konsensuale për hetimin ndërkombëtar
Kreu i opozitës Lulzim Basha ka kërkuar nga Kuvendi që ditën e enjte në seancën plenare të bashkohen votot për një hetim ndërkombëtar në lidhje me aferën e CEZ. Po ashtu Basha foli edhe për reformën në drejtësi, i cili tha se kjo reformë nuk duhet bërë për të shpërfytyruar kushtetutën.
“Presim dhe kërkojmë nga Kuvendi një votë konsensuale për projektligjin e hetimit ndërkombëtar. Presim nga Prokuroria veprime të shpejta profesionale dhe kurajoze për hetimin dhe çuarjen para drejtësisë të çdo personi përgjegjës. Ne i garantojmë mbështetjen tonë të plotë. Asgjë nuk na ndal në këtë betejë as diversion i trashë, as diversioni i hollë, as manovrat e trasha dhe as manovrat e holla të Ramës dhe Metës”, tha Basha.
Ndwrkohw Basha bëri edhe lidhjen mes marrëveshjes së kaluar në Kuvend për zgjidhjen me mirëkuptim të përplasjes mes qeverisë shqiptare dhe CEZ-it dhe skandalit të mbledhjes së borxheve prej kompanisë DIA.
“Qeveria shqiptare hoqi dorë nga të gjitha gjyqet civile, por mori përsipër fshehjen dhe ndalimin e ndjekjes penale ndaj Hajsek dhe të tjerëve, pavarësisht se ishin denoncuar nga qeveria “Berisha”. Opozita akuzon qeverinë Rama-Meta si shpërdorues të të paktën 600 mln euro pasuri të shqiptarëve. Ka njerëz që mendojnë se marrëveshja kriminale e 31 korrikut 2014 me CEZ dhe skandali i aferës CEZ-DIA janë dy gjëra të ndryshme, por ato janë të lidhura dhe pjesë e një skandali të vetëm. Lidhja që i bën bashkë është klauzola e ndalimit të çdo kallëzimi, hetimi në proces dhe çdo hetimi të asaj që ka ndodhur gjatë qëndrimit të CEZ-it në Shqipëri. Kjo dhe kalimi në votim në heshtje i shërbyen varrosjes së një krimi të madh financiar”, tha Basha.
