Nga Armando Meta/
SPECIALE JAVANEWS/ Afera prej 1 mln USD për lobim në SHBA dhe mbajtja fshehur e kësaj pagese duke mos e deklaruar, qartazi duket se e ka vendosur kreun e PD Lulzim Basha në pozitën më të vështirë politike që kur ai u angazhua në PD 12 vite më parë, pas skandalit me rrugën Durrës- Kukës, ku Basha ishte sërish protagonist i një afere akoma më të madhe në shifrat 200 mln euro, sipas Prokurorisë shqiptare. Përtej ‘akrobacive’ legjislacioni shqiptar mbështetur në ligjin për “Partitë politike” dhe Kodin Zgjedhor është i qartë në këtë drejtim. Legjislacioni shqiptar detyron partitë politike, sa i përket financimeve, që të udhëhiqen nga transparenca. Çdo e dhënë për burimet financiare të partive si dhe shpenzimet e tyre bëhen publike duke nisur që nga burimet financiare, kuota e anëtarësisë, fondet publike, fondet jo publike. Lidhur me këto, partitë politike dorëzojnë raportet financiare një herë në vit pranë KQZ, të cilat duhet të përmbajnë informacion të detajuar për burimet e financimit dhe shpenzimet. Partia politike dorëzon në KQZ kopje të plotë të dokumentacionit, shkruan javanews.al.
Skema
Nga dita e shpalljes së rezultatit të zgjedhjeve, brenda 60 ditëve, çdo parti duhet të kishte regjistruar dhe bërë publik të gjithë dokumentacionin, të ardhura-shpenzime. Në rastin e PD kemi të bëjmë me mosdeklarim të burimit të të ardhurave për shumën prej afro 1 milion USD. Shpenzimi i kësaj shume dyshohet se është bërë në kundërshtim me rregullat e përcaktuara nga Kodi Zgjedhor. Lidhja e kontratës direkte me vlerë 25 mijë dollarë, e firmosur nga Basha, është shoqëruar me disa kontrata indirekte me vlerë të lartë përmes një kompanie guackë me kapital vetëm 100 paund. Një kompani e regjistruar në Edinburg, pronarë të së cilës janë dy kompani të tjera, “Azvero-Comporation” dhe “Liminal Comerce”, të cilat kanë bërë pagesa në emër të PD dhe Bashës në vlerën 525 mijë dollarë brenda një dite. Kjo është forma më e përdorur e pastrimit të parave, e shmangies nga taksat dhe tatimet. Është një nga rastet më tipike të shkeljes së rekomandimeve të Financial Action Taxs Force, si institucioni më serioz kundër pastrimit të parave. Nga ana tjetër kjo skemë është në shkelje të hapur me ligjin 9917, i vitit 2008 i ndryshuar “Për parandalimin e pastrimit të parave dhe financimin e terrorizmit”. Sipas nenit 287 të cituar më sipër, pagesat janë bërë me para të cilat burojnë nga burime të paligjshme, shkruan javanews.al.
