Deputeti socialist, Erion Braçe e cilëson të dështuar privatizimin e aeroportit ndërkombëtar “Nënë Tereza” të Rinasit. Kryetari i komisionit parlamentar të Ekonomisë, i ftuar në “45 minuta” nga Denis Minga tha se mbetet sërish partizan i zgjidhjes së kontratës me koncesionarin e TIA-s.
“Në mënyrën sesi po menaxhohet aeroporti i Rinasit edhe në planin e shërbimit publik kundrejt qytetarëve, kam parasysh kostot, edhe shërbimin atje brenda, natyrisht siç isha partizan para shumë vitesh për prishjen e kontratës, ashtu jam partizan edhe tani. Një shërbim publik që ka të bëjë edhe me sigurinë kombëtare, është shumë herë më i mirë se një shërbim i dështuar privat. Ka një eufori të madhe që sa më shumë të lëshosh shërbime tek privati aq më shumë përmirëson. Këto aq më shumë kanë dështuar”, u shpreh Braçe.
Sipas tij, grabitja e 1 milionë eurove në 30 Qershor, është përgjegjësi e koncesionarit të aeroportit, pasi ngjarja ka ndodhur brenda perimetrit që kontrollon TIA.
“Perimetri i koncesionit u thye se ishte lehtësisht i arritshëm nga çdo keqbërës. S’kam pse të vesh me përgjegjësi Ministrinë e Brendshme. Për parandalimin padyshim që Policia ka detyrën e saj. Është edhe SHISH në këtë mes e për të nuk thuhet asgjë. Me atë kontratë dhe mënyrën se si është ndarë përgjegjësia nuk kemi gjë në vijë”, tha ai.
shqiptarja.com/d.i.
