Për 11 muaj, në vendin tonë, përmes aeroportit të Rinasir kanë hyrë 10 milionë pasagjerë. Shifra u bë e ditur nga vetë kreu i qeverisë, Edi Rama, i cili zhvilloi sot konferencën e fundvitit në ambientet e kryeministrisë.
Rama tha se dikur aeroproti ishte si “kotec pulash”, por sot është mbi aeroportin e Beogradit, i cili ishte kryeqendra e rajonit të Ballkanit.
Rama: Në aeroportin e Rinasit në nëntor mbyllet bilanci me 10 mln pasagjerë. Për këdo që nuk i vjen inat pse Shqipëria ecën kështu si po ecën për shkak se ka problem mënyrën si qeveris unë dhe si qeverisim ne, më vjen shumë keq, por sot për të dytin vit kemi aeroportin më të madh të rajonit dhe jemi mbi Beogradin që ka qenë kryeqendra e këtij rajoni dhe që e ka patur aeroportin kryesor në këtë rajon kur ne kishim një kotec pulash fluturuese në Rinas, kur pulat numëroheshin në mëngjes kur dilnin nga koteci dhe numëroheshin në darkë kur vinin në kotec.
Ju nuk e keni parë Rinasin në atë kohë, por unë e kam parë se më është dashur të fluturoj, kam qenë një nga pulat, kemi qenë në aktivitetet ndërkombëtare të basketbollit… Ishte bosh, një kamarier, një banakier. Por sot, nuk e solli koha, por e solli gjithë kjo punë kolosale që është bërë me vite.
