Qytetarët të cilëve nuk u përputhet adresa e vendbanimit real, me atë të regjistruar në gjendjen civile kanë vetëm 48 orë kohë për të kryer procedurat e zhvendosjes. Drejtori i Përgjithshëm i Gjendjes Civile, Bledar Doracaj thotë për SCAN se afati i korrektimit të adresës së vendbanimit përfundon më 27 korrik. Pas kësaj dite, çdo qytetar që nuk ka kryer zhvendosjen do të gjobitet me 10 mijë lekë të reja.
“Të gjithë ata qytetarë të cilët kanë vendbanimin, kanë gjendjen civile në një vend tjetër nga vendi ku ata banojnë realisht, duhet të rendin gjatë këtyre 48 orëve të mbetura pranë zyrave të gjendjes civile për të bërë ndryshimet përkatëse. Në të kundërtën më datë 28, kushdo që do të bëjë ndryshimin e vendbanimit do të ketë një masë administrative gjobë prej 10 mijë lekësh”, thotë kreu i Drejtorisë së Përgjithshme të Gjendjes Civile.
Doracaj fton qytetarët që të shfrytëzojnë orët e mbetura për të kryer zhvendosjen e adresës falas, përmes një procedure shumë të thjeshtë.
“Por e ritheksoj për të disatën herë, dokumentet janë: Kontrata e qirasë ose certifikata e pronësisë, si dokument që tregon se shtetasi ka titull pronësie për banesën, dokumenti që objekti është në proces legalizimi, kontratë sipërmarrje apo çdo dokument tjetër i përcaktuar. Dokumenti i dytë është kopja e kartës së identitetit të personit apo personave madhorë në familje. Janë 2 dokumente, vetëm 2-3 minuta punë te nëpunësi i gjendjes civile për të përfituar këtë shërbim. Ne kemi urdhëruar që sportelet të qëndrojnë hapur derisa të largohet edhe qytetari i fundit”, u shpreh Doracaj.
6 muaj më parë, Ministria e Brendshme aplikoi një amnisti e cila parashikonte faljen e masës së gjobës për mosdeklarimin e ndryshimit të vendbanimit./ma.me
