Në muajin maj 2025, Administrata Tatimore ka evidentuar një rritje të detyrimeve tatimore të papaguara me 4.7 miliardë lekë. Kjo rritje e borxhit tatimor është një sinjal alarmi për ekonominë dhe administratën fiskale të vendit.
Sipas të dhënave të fundit, detyrimet më të mëdha të papaguara i përkasin tatimeve mbi vlerën e shtuar, tatimit mbi fitimin dhe sigurimeve shoqërore e shëndetësore.
Këto shifra tregojnë se sektorët më problematikë janë ata që lidhen me pagesat e detyrimeve të përditshme të bizneseve dhe individëve. Për ekspertët, rritja e borxhit tatimor nuk përfaqëson thjesht një dështim administrativ në mbledhjen e të ardhurave, por është pasojë e një kombinimi faktorësh kompleksë që veprojnë në disa nivele, si mungesa e likuiditetit, veçanërisht në ndërmarrjet e vogla dhe të mesme, dhe përhapja e pritshmërive për një tjetër amnisti tatimore.
Referuar të dhënave nga Administrata Tatimore, sektorët me peshën më të lartë të detyrimeve janë ndërtimi, shërbimet dhe tregtia.
Në fund të vitit 2023, detyrimet tatimore të papaguara ishin rreth 155 miliardë lekë (1.5 miliardë euro), duke shënuar një rritje vjetore prej 6%. Në fund të vitit 2024, kjo shifër u rrit në 162.5 miliardë lekë (1.62 miliardë euro), një rritje prej 4.7% krahasuar me vitin e mëparshëm.
Pjesa më e madhe e këtyre detyrimeve, rreth 55%, janë të periudhës mbi pesëvjeçare, ndërsa vetëm 10% janë detyrime të krijuara brenda një viti.
Administrata Tatimore u bën thirrje të gjithë tatimpaguesve të shlyejnë detyrimet e tyre brenda afateve ligjore për të shmangur gjoba, kamatëvonesa dhe masa shtrënguese që mund të ndikojnë negativisht në aktivitetin e tyre ekonomik.
