Verifikimet e kryera gjatë vitit 2018 nga ana e Komisionerit për Mbikqyrjen e Shërbimit Civil kanë zbardhur një numër shumë të madh pozicionesh pune në administratë të plotësuara në kundërshtim në ligjin.
Scan ka zbardhur raportin zyrtar të Komisionerit, për rreth 1600 pozicione pune në administratë të kontrolluara gjatë vitit të shkuar, 22% e të cilave rezultojnë në kundërshtim me ligjin.
“Janë mbikëqyrur 1592 pozicione pune, nga të cilat janë konstatuar 960 raste të emërimeve në detyrë në përputhje me kërkesat e ligjit; janë evidentuar 357 raste, të emërimeve të parregullta, që zënë 22% të pozicioneve të punës pjesë e shërbimit civil, të institucioneve të mbikëqyrura, ku përfshihen emërime të kryera në kundërshtim me procedurat e rekrutimit, si dhe raste të nëpunësve ekzistues të cilët nuk plotësojnë kriterin e nivelit të diplomës së arsimit të lartë, ose nuk plotësojnë kriteret për pozicionin e punës ku janë të emëruar” -thekson Komisioneri.
Institucioni bën me dije se Për të gjitha rastet e emërimeve në kundërshtim me ligjin, janë urdhëruar personat përgjegjës, të rregullojnë pasojat e paligjshmërisë, duke filluar me ndërprerjen e marrëdhënies së punës dhe duke vijuar njëkohësisht me shpalljen e vendeve të lira dhe zhvillimin e rekrutimit, në përputhje me ligjin. (Scan)
