Ministria e Financave dhe Ekonomisë bllokon financimin për Bashkinë e Shkodrës, në kushtet kur sot, më 20 gusht, përfundoi zyrtarisht mandati i kryetares së Bashkisë së Shkodrës, Voltana Ademi.
Kryebashkiaku i zgjedhur në zgjedhjet lokale të 30 qershorit, Valdrin Pjetri, u tërhoq nga gara pas publikimit të një vendimi të drejtësisë italiane që e kishte dënuar më dëbim nga shteti dhe gjobë për drogë.
Këshilli Bashkiak i Shkodrës u konstituua ditën e djeshme, por në kushtet kur Bashkia nuk e ka një kryetar, në mungesë kjo edhe të një date të re zgjedhjesh nga Presidenti Ilir Meta që tha se zgjedhjet në të gjitha bashkitë do të bëhen më 13 tetor, Ministria e Financave është detyruar të marrë këtë vendim.
Kryebashkikja Voltana Ademi, që sot i përfundoi mandati, ka deklaruar se do të qëndrojë në detyrë deri kur të mbahen zgjedhje të ligjshme, ato të 13 tetorit.
Ademi i ka dërguar sot një letër ministres Anila Denajt, si edhe përfaqësuesve të SHBA-ve dhe BE-së.
Ajo shpreh shqetësimin se Ministria e Financave, Drejtoria e Përgjithshme e Thesarit, përmes Degës së Thesarit në Shkodër, kanë penguar funksionimin e bashkisë që ajo drejton. Sipas saj, janë bllokuar të gjitha procedurat e likuidimit me fondet e veta për shërbime dhe investime.
Ademi kërkon që kjo situatë të zgjidhet sa më shpejt, ndërsa veprimin e quan të paprecedentë.
/a.r
