Moti me dëborë dhe temperatura të ulëta e ngrica ka shkaktuar probleme edhe në kulturat bujqësore, në disa rrethe të vendit.
Kultivuesit e luleshtrydheve në rrethin e Fierit, ku evidentohet edhe sasia më e madhe prodhimit të dëmtuar, po rrisin interesin për të siguruar produktet e tyre bujqësore, si alternativa më e mirë të mbrojtur ekonomitë e tyre nga dëmet natyrore.
Disa kompani sigurimi po operojnë së bashku prej disa muajsh mbi bazën e një marrëveshje, në mbështetje të prodhimit bujqësor nëpërmjet futjes dhe zhvillimit të produkteve të sigurimit në sektorin e bujqësisë raporton ATA. Vitet e fundit, rastet e katastrofave natyrore të ndodhura shpesh në vendin tonë, janë shoqëruar me pasoja të rënda ekonomike për fermerët. Ndaj dhe ky projekt pilot, dhe zgjerimi i tij, me një numër më të konsiderueshëm të fermerëve dhe blegtorëve, po shihet si një nevojë e domosdoshme për të siguruar investimet e bëra me aq mund nga ana e tyre.
Fillimisht fermerët po sigurojnë prodhimet në sera dhe gradualisht po rrisin interesin për sigurimin e blegtorisë dhe shpendëve./a.m.
