Më shumë se 100 persona do të padisin muzikantin Sean Diddy Combs për sulm seksual, përdhunim dhe shfrytëzim seksual. Ka qenë kjo deklarata e avokatit, Tony Buzbee, i cili tha se disa nga viktimat e supozuara përfshijnë të mitur që janë abuzuar kur ishin vetëm 9 vjeç.
“Kjo është një çështje e rëndësishme që synojmë ta ndjekim intensivisht”, tha avokati për gazetarët.
Buzbee u shpreh se ai dhe ekipi i tij nuk do të lënë gur pa lëvizur për të gjetur palët e mundshme përgjegjëse në abuzimet e supozuara, ose çdo individ apo ent që ka marrë pjesë ose ka përfituar nga sjellja skandaloze.
Sipas Buzbee, numri i përgjithshëm i viktimave të supozuara që ai përfaqëson është 120, ku gjysma e tyre janë burra dhe gjysma tjetër gra që vijnë nga më shumë se 25 shtete në të gjithë SHBA. Avokati shtoi se 25 nga viktimat e supozuara që ai përfaqëson kanë qenë të mitur. Kjo është hera e parë që Combs akuzohet për abuzim seksual me fëmijë.
Shumica e paditësve pretendojnë se u përdhunuan pas eventeve të organizuara nga Combs që u mbajtën në vende të njohura, si dhe në rezidenca private apo hotele.
Një nga viktimat e supozuara, pretendon se është abuzuar seksualisht nga Combs dhe bashkëpunëtorët e tij kur ishte 9 vjeç. Ngjarja sipas tij, ka ndodhur në një studio regjistrimi në New York teksa përpiqej që të arrinte një marrëveshje diskografike.
“Po të mos ishte ai në pushtet, mendoj se mund të kisha qenë diçka e madhe. Unë u largova nga industria për shkak të asaj që më bëri Sean Combs”, tha ai në një deklaratë përmes avokatit.
Nga ana tjetër, avokatja që përfaqëson Combs, Erica Wolff tha se reperi i mohon kategorikisht akuzat duke thënë se janë të rreme dhe shpifëse.
Wolff tha në një deklaratë për BBC se Combs pret me padurim të provojë pafajësinë e tij dhe të shfajësohet në gjykatë, ku e vërteta do të vërtetohet bazuar në prova, jo në spekulime.
Sjellim në vëmendje se Combs u arrestua 2 javë më parë dhe po përballet me akuza penale për shantazh dhe trafik seksual. Ai aktualisht është në paraburgim pasi iu mohua lirimi me kusht, të cilin ai po e apelon. Ndërkohë, ai ka mohuar të gjitha akuzat që rëndojnë mbi të.
/a.r
