Një studim i realizuar nga Agjencia Shtetërore për Mbrojtjen e të Drejtave të Fëmijëve, pranë Ministrisë së Mirëqenies Sociale dhe Rinisë ka arritur në përfundimin se abuzimi seksual ndaj fëmijëve ndodh kryesisht brenda rrethit të besimit (brenda familjes apo të afërmve), ndërkohë që vihet re një mangësi në raportim nga profesionistët që e kanë për detyrë t’i denoncojnë këto raste”. “Gazeta Shqiptare”, cituar nga Balkanweb, tregon se këto janë dy prej gjetjeve kryesore të studimit “Abuzimi seksual i fëmijëve brenda rrethit të besimit”.
Ai u shtri gjatë periudhës gusht-tetor 2015 në rrethet Tiranë, Shkodër, Korçë, Fier dhe Elbasan dhe konsistoi në diskutime në fokus-grupe, intervista të thelluara, dhe studime rastesh konkrete të fëmijëve viktima të abuzimit seksual. Sa i takon mangësisë në raportim, nga ana e profesionistëve u vu re se kjo vjen kryesisht si pasojë e pasigurisë.
“Një pjesë e madhe e profesionistëve të përfshirë në sistemin e mbrojtjes së fëmijëve të abuzuar seksualisht brenda rrethit të tyre të besimit u shprehën se nuk ndihen të sigurt dhe se marrin shpesh kërcënime nga abuzuesit apo familjarët e tyre, çka i bën ata të heqin dorë nga raportimi i rasteve. Rrjedhja e informacionit (humbja e konfidencialitetit), raportimi i papërshtatshëm në media dhe stigmatizimi i viktimës shfaqen si arsyet kryesore të mosdenoncimit të rasteve të fëmijëve të abuzuar seksualisht brenda rrethit të tyre të besimit”, thuhet ndër të tjera në gjetjet e raportit.
Pas përpunimit të të dhënave, u vu re gjithashtu se ka ende mangësi në sistemin e mbrojtjes së fëmijëve, lidhur me numrin e kufizuar të burimeve njerëzore, mangësitë në njohuri dhe aftësi profesionale të punonjësve, paqartësitë lidhur me rolet dhe përshkrimet e punës, problemet lidhur me menaxhimin e rastit, mungesë bashkëpunimi ndërinstitucionale dhe ndërhyrje të pakta parandaluese. Të tjera të dhëna të rëndësishme lidhen edhe me mosbesimin te drejtësia si dhe mungesën e ndihmës afatgjatë dhe rehabilitimit të viktimës.
BW
