Drejtori i shkollës në fshatin Kryekuq të Divjakës, ku ndodhi abuzimi me nxënësen 11-vjeçare tregon se mësuesi 62-vjeçar nuk ka treguar më herët shenja. Pavarësisht asaj që ndodhi drejtori i shkollës thotë se institucioni që ai drejton ngelet një ambient i sigurt.
“Ne nuk kemi dalluar asnjë shenjë. Dhe jo vetëm ne, por edhe sikur një punonjës i SHISH-it të ishte mësues këtu te ne, nuk do të zbulonte asgjë. Mendoj se momentalisht është i sëmurë nga trutë e kokës, duke u kthyer kështu në në njeri anormal. Njerëzit anormalë mund të bëjnë çfarë të duan, por edhe përgjegjësinë e kanë individuale. Nuk diskutohet që përgjegjësi morale kemi edhe ne, por nxënësit këtu janë shumë të sigurtë”, thotë drejtori i shkollës 9-vjeçare.
Demir Hoxha, me një eksperiencë 43-vjeçare në Arsim, është tashmë nën akuzë për “marrëdhënie seksuale me të mitur” dhe “shpërdorim detyre”. Ka qenë një denoncim i mamasë së nxënëses së klasës së pestë, A.K., e cila ka nxjerrë në dritë ngjarjen.
