Në Podgoricë u zhvillua mbledhja e dytë e përbashkët midis qeverive të Shqipërisë dhe Malit të Zi, me nënshkrimin e një sërë marrëveshjesh mes dy vendeve, ku më e rëndësishmja është ajo për ndërtimin e urës në lumin Buna.
Në konferencën e përbashkët për shtyp, Kryeministri Dritan Abazoviç u shpreh se:
“Sot dërguam një mesazh të bukur, mesazhin e bashkëpunimit dhe ndërtimit të së ardhmes së përbashkët, të bashkëpunimit ekonomik. Do të jetë bashkëpunimi më i fuqishëm në të gjitha segmentet kur flasim për dy qeveritë. Jam krenar që kemi nënshkruar marrëveshjen për urën e Bunës që jo vetëm do lidhi dy shtetet po edhe do zhvillojë për turizmin. Synimi ynë është që njerëzit të kenë akses më të lehtë dhe minimizimi i trafikut si dhe perspektiva e zhvillimit të zonës.
Ne dëshirojmë të bëjmë çdo gjë në çdo segment edhe shëndetësi, mbrojtje, bujqësi, duam thjesht të themi se Mali i Zi dhe Shqipëria e shohin perspektivën e madhe në bashkëpunimin dhe raportet e ndërsjella mes dy vendeve. Jemi të dedikuar drejt të ardhmes në integrimin europian, të ardhmen e përbashkët e shohin në BE dhe duam të japim kontribut që këtu të japim këtë mesazh.”
Ndërkohë, Kryeministri Edi Rama pas mbledhjes së përbashkët me qeverinë e Malit të Zi, tha se me këtë shtet Shqipëria është më shumë se fqinj.
“Edhe një herë tjetër ne kemi ndjerë në vetë të parë ngrohtësinë mikpritjes dhe afrimitetin vëllazëror mes nesh. Dua ta përsëris këtu atë që thash gjatë mbledhjes. Shqipëria dhe Mal i Zi janë më shumë se sa fqinj. Samiti i Ballkanit të Hapur në qershor në Mal të Zi. Sot kemi një datë për liberalizimin e vizave të Kosovës dhe shumë mirë që BE më në fund është e ndjeshme ndaj rajonit“, tha Rama.
Duke u ndalur te projekti i urës mbi Bunë, nuk munguan as batuta nga Rama.
“Ju i keni rrogat më të larta se neve dhe sikur s’ka kuptim që Shqipëria të ndërtojë edhe pjesën e urës tuaj mbi Bunë. Se shumë pyesin, si do ta bëni këtë, do ndërtoni pjesën tuaj dhe pastaj?” – tha kryeministri shqiptar.
Mes dy qeverive u nënshkruan edhe nëntë marrëveshje e memorandume në fushat e: energjisë, peshkimit, mbrojtjes së bimëve, mbrojtjes sociale, sportit, kulturës dhe medias, mbrojtjes, shëndetësisë, si dhe marrëveshja për hapjen e kufirit të përbashkët në kalimin Shën Nikollë – Pulaj në territorin e Republikës së Shqipërisë.
/a.r
