Departamenti për Politika të Mbrojtjes dhe të Sigurisë DPMS i Aleancës për Ardhmërinë e Kosovës kërkon që me urgjencë të procedohet ligji për FAK–un, ushtrinë e Kosovës dhe kërkon shpjegime të drejtpërdrejta nga kryeministri Mustafa dhe ministri Demolli, se për çfarë arsyeje nuk po e procedojnë projektligjin për Forcat e Armatosura të Kosovës në Kuvend.
AAK thotë se Kuvendi duhet të themelojë menjëherë Ushtrinë e Kosovës, para sesionit të vjeshtës, ndryshe preferencat e Listës Serbe, përkatësisht asociacionit politik serb, do t’i rrisin orekset e tyre të pengimit dhe instrumentalizimit të mëtutjeshëm.
Departamenti i AAK-së për Politika të Mbrojtjes dhe të Sigurisë, nëpërmjet një komunikate për media kërkon pandalur që FAK–u, përkatësisht Ushtria e Kosovës të konsiderohet prioritet strategjik për Kosovën dhe përpara çdo lloj nisme në Kuvend dhe që menjëherë të veprohet në themelimin e tij.
DMPS i AAK–së i vlerëson përgjithësisht me notë negative paqartësitë në krijimin e kësaj situate të paqëndrueshmërisë parlamentare dhe pamundësisë së themelimit të FAK-ut nga qeveria Mustafa-Thaçi, duke theksuar se qeveria nuk ka treguar përgjegjësi kushtetuese dhe aftësi politike të menaxhimit dhe të ekspertizës për t’iu ofruar qytetarëve klimën e mirëbesimit, aspektin e sigurisë dhe mbrojtjes, në të gjitha nivelet e saj, për perspektivën e qëndrueshme socio-politike dhe ekonomike të Kosovës dhe qytetarëve të saj./Kosovapress
