Kryeministri Edi Rama dhe kreu i shtetit, Ilir Meta, janë takuar pasditen e së mërkurës për çështjen e negociatave me Greqinë. Takimi mes Ramës e Metës u zhvillua pak orë pasi në zyrën e kreut të shtetit kishte mbërritur letra nga Ministria e Jashtme, me sqarimet për kërkesat dhe rezervat e shprehura nga Presidenti i Republikës, shkruan “Panorama”.
Burimet bëjnë me dije se takimi mes Ramës e Metës u kërkuar në 2 mars nga kryetarja e Komisionit të Jashtëm, Mimi Kodheli dhe deputetja e PS, Vasilika Hysi, në takimin që u zhvillua në Presidencë.
Për 60 minuta, Rama e Meta kanë diskutuar lidhur me përplasjet e krijuara për grupin negociator dhe mbi sqarimet që Meta ka kërkuar para se të japë autorizimin për të negociuar me shtetin grek. Shpjegime për informacionet e detajuara që Meta kishte kërkuar, ishin dhënë edhe në letrën që ministri Bushati dërgoi këtë të mërkurë në Presidencë.
Përpara se të takohej me kreun e Qeverisë, Meta deklaroi për mediat se për dhënien e autorizimit të grupit negociator të përcaktuar nga ministri Bushati, do të vendosë në momentin e duhur. “Për çdo gjë do të vendos në momentin e duhur”, deklaroi Meta. Burime nga “Presidenca” sqarojnë për “Panorama” se presidenti do të ketë një qasje konstruktive për marrjen e vendimit final për grupin negociator.
TAKIMI
Në fokus të takimit mes Ramës dhe Metës, mësohet të kenë qenë diskutimet për negociatat me Greqinë. Rama ka dhënë sqarime në takimin e zhvilluar për takimet që ka pasur me përfaqësues të lartë të qeverisë greke për çështjet e ngelura pezull mes dy vendeve.
Në letrën e tij dërguar Bushatit, Meta kërkoi plotësimin të kuadrit legjislativ, ndryshim të titullit, sipas të cilit do të bëhet marrëveshje dhe sugjeroi përfaqësuesin e qeverisë për të bërë një analizë të brendshme tekniko-ligjore. Presidenti i Republikës i kërkoi gjithashtu grupit negociator të përcaktuar nga Bushati, të mos ulet në negociata pa hartat e duhura.
Për këto çështje, Meta priti në Presidencë edhe anëtarët e Komisionit të Jashtëm në Kuvend. Në përfundim të atij takimi, palët dolën me dakordësinë se pretendimet e kreut të shtetit ishin të drejta dhe se duhej respektuar vendimi i dhënë nga Gjykata Kushtetuese në vitin 2009, për marrëveshjen e parë me Greqinë./panorama/a.m.
