Statusi i ndërmarrjes më të madhe në vend, Trepçës, vazhdon të mos jetë i definuar, edhe pse një gjë e tillë ishte premtuar nga Qeveria e Kosovës në fillim të këtij viti, si përgjigje ndaj protestave të partive opozitare që po përshkallëzon në dhunë.
Disa javë para përfundimit të këtij viti, asnjë strategji apo ligj që do të përcaktonte fatin e Trepçës nuk është dërguar në Kuvendin e Kosovës. Ahmet Tmava, drejtor i Trepçës, i ka thënë Gazetës Fjala se mosdefinimi i statusit të kësaj ndërmarrje shkakton probleme në funksionin e Trepçës. “Po ju e dini që shkakton probleme mosdefimi i statusit. Këtë e kemi bërë publike shumë herë,” thotë ai, teksa tregon se javën e kaluar kanë pasur një takim me Kryeministrin Isa Mustafa për të biseduar rreth kësaj çështje.
Tmava nuk ka dhënë shumë detaje rreth bisedave, por ka thënë se ekziston mundësia që në të ardhmen Trepça të ketë ligjin e vet sipas të cilit do të funksiononte.
“Unë mendoj se ka ardhur momenti për të definuar [këtë çështje]”, thotë ai.
Në janar të këtij viti, parlamenti i Kosovës miratoi me shumicë votash një ligj për riorganizimin e ndërmarrjeve të caktuara dhe pasurisë së tyre. Përmes kësaj u hap rruga edhe për riorganizimin e Trepçës, mirëpo partitë opozitare në parlament kërkonin që të miratohet ligji i veçantë për Trepçën për ta kthyer atë në ndërmarrje publike.
Për dallim nga tani, në vitet e 1980-ta, Trepça konsiderohej njëra nga ndërmarrjet më të mëdha në ish-Jugosllavi, dhe kishte rreth 20.000 të punësuar. Aktualisht, Trepça ndodhet nën menaxhimin e Agjencisë së Privatizimit të Kosovës (AKP), e cila për shumë kohë ka mbetur jashtë funksionit në mungesë të bordit.
Kur po bëhen një vit që nga ardhja në pushtet e Isa Mustafës, një pjesë e madhe e agjencive të pavarura vazhdojnë të mbesin jashtë funksionit meqë partitë e koalicionit nuk kanë arritur të emërojnë zyrtarë në këto pozita.
