A mund të konsiderohet varësia ndaj shopingut si sëmundje?
Njerëzit që blejnë deri në “rënie”, dmth deri në limitin e parave kanë varësi ndaj shopingut. Këta njerëz besojnë se nëse blejnë çdo gjë që ju pëlqen në një dyqan, do të ndihen më mirë. Por më vonë, shopingu i pakontrolluar dhe shpenzimet e shumta do t’i bëjnë këta njerëz të ndihen keq. Kjo lloj varësie është e njëjtë me varësitë e tjera, si: alkooli, duhani, droga, lojrat e fatit etj. Shopingu dhe shpenzimet nuk do t’ju bëjnë të ndiheni më mirë dhe më “të veshur”, ata do t’ju bëjnë të varur pas tyre dhe vështirë se do t’i shpëtoni kësaj sjelljeje.
Si mund ta kuptoni nëse keni krijuar varësi ndaj shopingut?
Varësia ndaj shopingut prek më shumë gratë sesa burrat. Një nga shenjat që tregon se jeni të varur ndaj shopingut, është kur blini gjëra për të cilat nuk keni nevojë. Kur blini më shumë seç duhet dhe i blini menjëherë, pa pritur sezonin e uljeve, nga frika se mos nuk e gjeni më fustanin apo produktin e preferuar. Rastet kur harxhoni çdo qindarkë të fundit për një produkt, pa u merakosur për gjërat e tjera në vazhdim, tregon se jeni të varur ndaj shopingut dhe shpenzimeve. Nëse familjarët apo shokët e dikujt që është i varur ndaj shopingut, i kritikojnë apo ankohen për blerjet e tyre, ata kanë tendencën që herët e tjera t’i fshehin produktet që kanë blerë.
Si mund ta kontrolloni varësinë ndaj shopingut?
Në ditët e sotme është rekomanduar që njerëzit që kanë varësi ndaj shopingut duhet të kërkojnë këshillim profesional. Sjelljet “e varësisë” krijojnë çrregullime, njësoj si droga, alkooli, bixhozi, ndaj dhe vartësit e shopingut nuk bëjnë përjashtim. Në Amerikë janë krijuar disa qendra këshillimi për personat që vuajnë nga varësia ndaj shopingut.
