Rusia ka sinjalizuar se Kina dhe India mund të luajnë një rol ndërmjetësues për t’i dhënë fund luftës në Ukrainë.
Zëdhënësi i Kremlinit, Dmitry Peskov, deklaroi se presidenti kinez Xi Jinping dhe kryeministri indian Narendra Modi kanë propozuar gjatë takimeve me Vladimir Putinin që të kontribuojnë në përpjekjet për paqe mes Moskës dhe Kievit.
Sipas Peskovit, Moska nuk e përjashton këtë mundësi në të ardhmen, ndonëse një proces i tillë mund të shqyrtohet pas zgjedhjeve të shtatorit në Rusi.
Ideja e një ndërmjetësimi kinez apo indian nuk është e re. Kina është përmendur si ndërmjetësuese që prej vitit 2022, ndërsa Modi është ofruar më herët për të ndihmuar në dialog. Megjithatë, roli i tyre mbetet i diskutueshëm, veçanërisht për shkak të marrëdhënieve të ngushta që të dy vendet kanë me Moskën.
Deklaratat vijnë në një kohë kur edhe përpjekjet e administratës së Donald Trump për të ndërmjetësuar konfliktin nuk kanë prodhuar ende një marrëveshje konkrete.
Ndërkohë, samiti i BRICS-it në Nju Delhi ka nxjerrë në pah edhe afrimin e ri mes Kinës dhe Indisë, pas tensioneve kufitare të viteve të fundit. Tregtia mes dy vendeve është rritur ndjeshëm, ndërsa të dyja palët duket se po kërkojnë të forcojnë bashkëpunimin përballë politikave të Uashingtonit.
Samiti përfundoi me një deklaratë të përbashkët, ndërsa BRICS po zgjerohet dhe synon një rol gjithnjë e më të madh në skenën globale.
