Aleanca për Shqipërinë Europian pasditen e sotme ka vijuar takimet elektorale në qytetin e Fierit, në mbështetje të kandidati Armando Subashi.
Kreu i Lëvizjes Socialiste për Integrim dhe njëkohësisht dhe Kryetari i Kuvendit, Ilir Meta tha se “jam sot këtu në Fier, për të mbështetur fuqimisht kandidatin tonë Armando Subashin për detyrën e kryebashkiakut të bashkisë së re të madh të Fierit. Unë jam krenar që kam bashkëpunuar me Armandon gjithë këtë kohë pasi ai ka bërë një punë të shkëlqyer në mbështetje të shumë reformave të rëndësishme, ku një prej tyre dhe më e rëndësishmja që hyn në fuqi në 21 qershor me votën e mbi 1 milion shqipëtarëve është reforma administrative territoriale. Reforma administrative-territoriale është në krye-reformave që do t’i çojë energjitë e vendit tonë në drejtimin e duhur”.
Meta gjatë fjalës së tij nënvizoi se drejtimi i duhur për Fierin do të thotë më shumë shërbim.
Nga ana e tij, Kryeministri Rama tha se “nuk besoj se ka një vend më të përshtatshëm dhe një atmosferë më të përshtatshme për të ju uruar të gjithë socialistëve ditëlindjen e PS-së, për t’ju thënë që ne socialistët dhe progresistët, jemi dy parti dhe një fuqi e vetme sepse kemi kapitalin më të madh njerëzit për të bërë të mundur realizimin e ëndrrave e atyre që kanë besuar tek ne”.
Kryeministri Rama u bëri thirrje qytetarëve të Fierit për pjesëmarrje të gjërë në këto zgjedhje lokale.
“Ka një rëndësi të jashtëzakonshme që të gjithë të marrin pjesë në votim, që ta investojnë besimin e tyre në drejtimin e duhur, për Armando Subashin dhe ASHE”, tha Rama.
Rama dhe Meta në Lushnje: Me reformën administrative, Lushnja do të jetë lokomotiva e industrisë agropërpunuese
Kryeministri Edi Rama dhe Kryetari i Kuvendit Ilir Meta, morën pjesë edhe në mitingun përmbyllës në sheshin qëndror të qytetit të Lushnjes, për Kandidatin e Aleancës për Shqipërinë Europiane, Fatos Tushe.
Lideri i LSI-së shprehu bindjen se më 21 qershor shqiptaret do të japin një mbështetje historike për reformën e re administrative territoriale. “Kjo është një reformë e rëndësishme pasi do të krijojë mundësi për të rritur punësimin dhe shërbimin qytetarëve të Lushnjës, do bëjë të mundur që duke bashkuar gjitha këto resurse natyrore të hapim më shumë vende pune”, deklaroi Meta.
Ndërsa Kryeministri Rama duke iu referuar reformës territoriale, shprehu rëndësinë e saj edhe për qytetin e Lushnjes. “Jam krenar se aleanca jonë ka hedhur një hap të rëndësishëm, pasi për herë të parë Shqipëria do të votojë për të çuar 50% vajza e gra në kuvendet bashkiake.
