Eugena Tomini, Shefja e Survejancës dhe Shërbimit të Inteligjencës Epidemike në ISHP, siguroi në një lidhje direkte me “Ditari” në A2 se në fund të muajit janar nuk ka pasur persona me Covid-19 në vendin tonë.
Mbrëmjen e djeshme, mjeku radiolog Ardian Mata tha për A2 se “shumë imazhe që kemi parë në janar dhe në fillim të shkurtit janë pothuajse identike me ato që po gjykohen si pozitive nga COVID-19, me dëmtime pulmonare që nuk rezultojnë në virozat e tjera”.
Sipas Tominit, pacienti 0 është ai i konfirmuar në datën 9 mars: “Mbështetur në të dhënat tona, ju siguroj që në fund të muajit janar laboratori i virologjisë nuk ka ndalur së testuari raste për Covid-19. Asnjë prej tyre nuk ka rezultuar me koronavirus. Për ne, pacienti 0 është ai i konfirmuar në datën 9 mars”.
Më tej, Tomini theksoi: “Aktualisht, kemi një epidemi të lokalizuar vetëm në vatra familjare. Kalimi nga karantina në lirimin gradual, mund të çojë në tendencë në rritje të rasteve të reja. Me lehtësimin e masave shtohet ekspozimi i popullatës përkundrejt rasteve asimptomatike, por respektimi i masave të distancimit social marrin edhe më shumë vlerë tani”.
Gjithashtu, shtoi se “çdo subjekt, që të rifillojë dhe të vijojë aktivitetin, duhet të respektojë rigorozisht protokollet e sigurisë”.
Në fund, Tomini dha edhe mendimin e saj për verën që na pret: “Vera do të jetë ndryshe nga të tjerat, nuk do të jetë ajo lirshmëria e të shijuarit të detit dhe diellit. Do të ketë rregulla strikte për bizneset dhe turistët. Unë mendoj se me respektimin e protokolleve të caktuara, edhe kjo verë do të shijohet, por në mënyrën e saj të veçantë”.
g.kosovari
